firansiye asasiy qanun sot mehkimisi türkiyege munasiwetlik qanunni ret qildi
firansiye asasiy qanun sot mehkimisi 1915 – yilqi ermeni dewalirini öz ichige alghan «bir qisim jinayetlerni ret qilishni jinayet hésablash» qa munasiwetlik qanunning hökmini bikar qildi.
türkiye awazi radiyosi xewiri: mehkimening bu heqtiki qararida, mewjut nepretke teshwiq qilishqa munasiwetlik qanunlar bolghanliqi üchün, bultur qanunlashqan qararnamige éhtiyaj yoqluqi tekitlinip mundaq déyildi: «bu qanun sadir qilinghan haman jinayet teshkil qilmaydighan weqeler heqqide analiz élip bérishni jazalashqa yol achmaqta. shuning bilen bir waqitta, bu qanun adette tarixiy hadisiler heqqide élip bérilidighan bes – munaziriler arqiliq qararlashturulushqa tégishlik weqeler we pikirlerning qanunluq yaki emesliki mesiliside éniqsizliqni keltürüp chiqarmaqta. jümlidin bu qanun pikir erkinlikige kéreksiz we adettin tashqiri derijide hujumdur.»
qanunning parlamént we palataning maqulluqidin ötüshi türkiyening we firansiyediki türk jemiyetlirining qattiq naraziliqini qozghighan, kéyinche bu qanun üstidin bir asasiy qanun mutexessisi we türk jemiyetlirining iltimas sunushi netijiside asasiy qanun sot mehkimisige erz sunulghanidi.
firansiye asasiy qanun sot mehkimisining bu qanun heqqide qarar chiqirishi «türkiyening qanuniy jehettiki zepiri» dep qaralmaqta.
firansiyede nikolas sarkozy pirézidént wezipisi ötigen mezgilde qobul qilinghan yene shuninggha oxshighan bir qanunmu pikir erkinlikige cheklime qoyidighanliqi tüpeyli asasiy qanun sot mehkimisi teripidin bikar qilinghanidi.
