«béyjing teywenni qoral küchi bilen özige qoshuwélishi kérek»

xitay kommunist  partiyesining resmiy médiya orgini teywen pirézidéntining amérikining yéngidin saylanghan pirézidénti donald tramp bilen körüshüshidin kéyin, «teywen musteqilliqini élan qilsa, béyjing qoral küchi bilen teywenni özige qoshuwélishi kérek»dégen mezmunda maqale élan qildi.

donald trampning amérika bilen xitay otturisidiki teywenge munasiwetlik kélishimge xitaydin perqliq halda muamile qilishi sewebidin kélip chiqqan talash-tartishlar dawamlashmaqta. xitay kommunist partiyesining resmiy ingilizche médiya orgini bolghan yershari waqit géziti bu heqte maqale élan qildi.

béyjing hökümitining teywenni qoral küchi bilen mejburiy özige qoshuwélish teshebbus qilinghan mezkur maqalide hökümet dairliri buninggha teyyarliq qilishqa chaqirildi. peyshenbe küni élan qilinghan maqalide «bir xitay siyasiti»üchün qilishqa tégishlik ishlarning nahayiti inchikilik bilen pilanlinishi kérekliki alahide eskertildi.

maqalide teywenning jazalandurulushi lazimliqi, shundaqla teywen arili etrapidiki mudapie qalqan sistémisining sanining ashurulushi kérekliki qeyt qilindi.  

béyjing hökümiti buningdin ilgiri bayanat élan qilip «bir xitay siyasiti»ning amérika-xitay munasiwetlirining asasini teshkil qilidighanliqini bildürgenidi.

bu maqale «eger xitay hakimiyiti döletning birliki üchün bésimni kücheytmise, tinch shekilde birlishish pursiti qolimizdin kétidu. tinchliq toxu yüreklerge teelluq emes»dégen jümle bilen axirlashti.