hilari klinton könglining yérim ikenlikini ashkarilidi

türkiye awazi radiyosi xewiri: amérikida 8-noyabir ötküzülgen pirézidéntliq saylimida jumhuriyetchilerning namzati donald trampqa utturup qoyghan démokratlarning namzati hilari klinton saylam meghlubiyitidin kéyin, ötküzülgen bir paaliyette tunji qétim xelqqe qaritip tesirlik nutuq sözlidi.

hilari klinton washingtonda «balilarni qoghdash fondi» paaliyitide nutuq sözlidi. uning könglining yérim ikenliki közliridin bilinip turatti. u: «shuni étirap qilimenki, bu kéche bu yerge kélishim asangha toxtimidi» dédi. u saylamdin kéyinki bir heptide öyidin sirtqa chiqmighanliqi üstide toxtilip: «bu bir hepte ichide bir qanche qétim yaxshi kitabtin birni we itimni élip, bashqa yerge kitip, öydin sirtqa chiqmasliqni oylighan waqitlirim boldi» dédi.

hilari klinton balilargha munasiwetlik bu paaliyette siyasiy mesililer toghrisida köp toxtalmidi, saylamda ghelibe qilghan donald tramp toghrisidimu héchqandaq éghiz achmidi. emma, wastilik halda tramp kabéntigha signal yollidi. u: «balilirimiz, aililirimiz we dölitimiz üchün qilidighan nurghun ishlirimiz bar» dédi.

u döletning saylam hawasida birlik, ittipaqliq menziresidin yiraqlashqan bolushi mumkinlikini eskertip, mundaq dédi:

«hazir undaq bolmighandek körünsimu, emma uning üstige bir nersilerni qoyalaydighan ortaq asasimiz bar.»

amérika taratqulirida élan qilinghan xewerlerde, hilari klintonning düshenbe (14-noyabir) küni démokratlarning bir wekilige: «héchkimning köngli méningkidek yérim emes, bu bir kéchidila ongshalmaydu» dégenliki ilgiri sürülgen idi.