putin:erméniye bilen ezerbeyjanning muresselishishini ümid qilimiz

türkiye awazi radiyosi xewiri: rusiye pirizédénti wiladimir putin erméniye bilen ezerbeyjan otturisidiki ixtilaplarni muresselishish yoli bilen hel qilishlirini ümid qilidighanliqini bildürdi.

kirmél sariyidin bu heqte élan qilinghan bayanatta, putinning erméniye pirizédénti sérj sarkisyan bilen moskowada körüshkenliki qeyt qilindi.

ikki pirizédént kirmél sariyida ayrim uchrashqandin kéyin qoshma axbarat élan qilish yighini ötküzdi.

putin sérj sarkisyan bilen ikki dölet munasiwetliri, soda we meblegh qatarliq mesililer üstide kéngesh ötküzgenliklirini éytti. erméniyening paytexti eriwanda iyulda bir saqchi ponkitining hujumgha uchrishi we saqchi xadimlirining görüge élinishini  qattiq eyibleydighanliqini éytqan putin, erméniyening rusiyening gholluq ittipaqdashliridin biri ikenlikini alahide eskertti.

rusiyening taghliq qarabagh mesilisige yéqindin köngül bölidighanliqlirini bildürgen putin, ikki qoshna dölet otturisidiki sürkilishni azaytishni xalaydighanliqlirini bildürüp mundaq dédi: «eriwan we baku bilen biwaste alaqe ornitip, qarabagh mesilisige hel qilish charisi tépish üchün qolimizdin kélishiche heriket qilimiz, erméniye bilen ezerbeyjanning otturisidiki ixtilaplarni ghalip yaki meghlup bolghuchi terepte turup emes muresselishish arqiliq hel qilishlirini ümid qilimiz.»

putin bu qétimqi körüshüshning ijabiy netijilirining köp tereplimlik istiratégiyelik rusiye-erméniye ittipaqdashliqi bilen rayonning muqimliqi we bixeterlikige ijabiy tesirlerni élip kélidighanliqini alahide tekitlep ötti.

erméniye pirizdénti sérj sarkisyanmu rusiye-erméniye munasiwetlirining nahayiti yuqiri sewiyede ikenlikini ipade qildi.

ikki dölet otturisidiki hemkarliq sahelirini barghanche kéngeytip barghanliqlirini éytqan sarkisyan, körüshüshte taghliq qarabagh mesilisinimu etrapliq kéngesh qilghanliqlirini alahide eskertti.