firansiyede qorqunchluq qetliam yüz bérip, 84 kishi öldi
firansiyening jenubidiki niys shehiride «14 – iyul milliy bayram küni» ni tebriklesh paaliyetliri jeryanida qorqunchluq qetliam yüz bérip, 84 kishi qaza qildi.
türkiye awazi radiyosi xewiri: tebriklesh paaliyetliri élip bériliwatqan yolda bir yük aptomobilining amma arisigha bösüp kirishi we shopurning xelqni oqqa tutushi netijiside 84 kishi qaza qildi.
ölgenlerning muhim bir qismi 15 métirliq yük aptomobilining 90 kilométirliq süret bilen uda 2 kilométir algha ilgirishi netijiside onlarche kishining ézilishi bilen meydangha keldi.
hujumda 47 si éghir bolup, 100 etrapida kishi yarilandi. dölet xewpsizlik küchliri derhal mudaxile qilip, shopurni öltürdi hemde bashqa zorawanlarningmu bolush éhtimalliqini közde tutup, axturup – tutush herikitini ishqa kirishtürdi.
melumatlargha qarighanda, yük aptomobilida köp sanda oq - dora we qoral – yaraghlar tépilghan bolup, hujum sheherde qattiq patparaqchiliqni keltürüp chiqarghan, hujum yüz bergen rayonning etrapida nurghunlighan kishiler chayxanilar we réstoranlarda qapsilip qalghan. saqchilar sheher ahalisini sirtqa chiqmasliq toghruluq agahlandurghan. hujumni tekshürüsh wezipisini «térrorizmgha qarshi küresh» qisimliri öz üstige alghan.
zorawanning kimliki yük aptomobilida tépilghan nerse – kérekler arqiliq éniqlap chiqilghan. buninggha asaslanghanda, 31 yashliq tégi tunisliq zorawan niys shehiride yashighan we kichik tiptiki jinayetlerni sadir qilghan. firansiye pirézidénti fransua oland hujumdin kéyin awignondiki tetilini yérim qaldurup, paytext parizhgha qaytqan hemde bash ministir menyuél wals we ichki kabinét ezaliri bilen jiddiy yighin chaqirghan, kéyinche eliyze sariyida xelqqe xitab qilip, firansiyening yene bir qétim qorqunchluq hujum bilen yüzleshkenlikini, jümlidin pütkül firansiyening térrorluq tehditi astida ikenlikini tekitligen.
hujumning firansiyening simwolliri biri bolghan muhim bir künde, erkinlikning simwoli bolghan 14 – iyul küni yüz bergenlikini eskertken oland zorawanning öltürülgenlikini, barliq orunlarning bixeterlik tedbirlirini qattiq kücheytip, kütülmigen ehwallargha taqabil turush pilanini ijra qilishqa bashlighanliqini qeyt qilghan, térrorizmgha qarshi küreshte yéngi basquchqa qedem qoyulghanliqini tekitlep mundaq dégen: «hushyarliqni téximu östürüp, sezgürlük asasida heriket qilip, bixeterlikni qoghdaymiz.»
u yene, mudditi 26 – iyul küni toshidighan jiddiiy haletning yene 3 ay uzartilidighanliqinimu sözlirige ilawe qilghan.
