amérikida yüz bergen qoralliq hujumda 50 adem öldi, jawabkarliqini daésh üstige aldi

türkiye awazi radiyosi xewiri: amérika qoshma ishtatlirining filorida ishtatigha qarashliq orlando shehiride meydangha kelgen weqedin kéyin orlandoda jiddiy halet élan qilindi. amérika pirézidénti barak obama weqege térrorluq hujumi, dep baha berdi we dölet miqyasida bayraqlarning yérim chüshürülüshi toghruluq yolyuruq chüshürdi.

esli afghanistanliq amérika puqrasi ömer metin sadir qilghan mezkur hujumning jawabkarliqini daésh térrorluq teshkilati üstige aldi.

hujum, amérika tarixining eng qanliq qoralliq hujumi süpitide tarix sehipiliridin orun aldi.

türkiye orlando shehiride meydangha kelgen térrorluq hujumini eyiblep bayanat élan qildi. türkiyening bayanatida, «orlandoda meydangha kélip köp sanda kishining jénigha zamin bolghan térrorluq hujumini eyibleymiz we amérika xelqige teziye bildürimiz» déyildi.

amérikida yashaydighan musulman jamaiti wekillirimu arqa – arqidin bayanat élan qilip, hujumdin chongqur qayghurghanliqlirini ipadileshti. «musulman teshkilat kéngishi» teripidin élan qilinghan bayanatta, «dinigha, renggige yaki jinsiy tallishigha qarimastin hujumgha uchrighan barliq kishi we guruppilar bilen bir septimiz. bu xainlarche hujumni eyibleymiz» dégen ibarilerge orun bérildi.

amérika islamiy ilimler kéngishimu hujumgha ‹nepretlinish jinayiti› dep baha béridighanliqini we eyibleydighanliqini élan qildi. bayanatta, islam dinida bu xil ashqun mayilliqlarning qetiy orun almighanliqi alahide tekitlendi.

musulmanlar jamaitining wekillirimu bayanat bérip, pütkül kishilerning zorawanliqqa, yeklinishke we hujumgha uchrimastin yashash hoquqigha ige ikenlikini tekitlidi.

bu jeryanda, noyabir éyidiki pirézidéntliq saylimida jumhuriyetchi qanattin pirézidént namzati bolush üchün seperwerlik paaliyetlirini dawamlashturuwatqan donald tramp, bu qétimqi hujumni musulmanlargha qarshi sözliri üchün suyiéstimal qildi. u buningdin ilgiri élan qilip küchlük naraziliqlarni peyda qilghan «musulmanlarning döletke kirishi meniy qilinsun» dégen teklipini tekrarlidi.

donald tramp ijtimaiy taratqu arqiliq uchur tarqitip, «pirézidént obama axirida ashqun islam térrori toghrisida söz qilamdu? eger qilmaydighan bolsa, derhal istipa bérishi kérek» dédi. trampning sözliri amérika médiyasining naraziliqini qozghidi. biri qisim taratqular, trampning mushundaq bir hujumdin kéyin qilghan sözlirige «pursetperestlik qilish» dep baha berdi.