firansiyediki ish tashlash téximu zoraydi
firansiyede xizmet qanun layihesige qarshi bashlanghan namayishlargha awiyatsiye shirkiti (Air France ) ning uchquchilirimu qatnashti.
türkiye awazi radiyosi xewiri: uchquchilarning eng chong üch uyushmisi 11 – 14 – iyun arisida ish tashlaydighanliqini élan qildi. bu ish tashlashning 10 – iyun bashlinidighan yawropa longqisi chimpéyonluqi üchün kélidighan sayahetchilerge tesir körsitidighanliqi perez qilinmaqta. tömür yol xizmetchilirimu 31 – may chiqarghan ish tashlash qararining mudditini uzartti.
melumatlargha asaslanghanda, oxshimighan uyushmilarning wekilliri muzakire ötküzgendin kéyin, ish tashlash mudditini uzartish toghrisidiki qarashlirini élan qilghan. ish tashlashning xelqaraliq, sheherlerara, rayonluq tömür yol qatnashlirigha tesir körsitidighan bolup, bezi qatnash seperliride %50 de aqsash körülidiken. firansiye tömür yol xizmetchiliri 31 – may muddetsiz ish tashlashqa atlanghan. buning netijiside, sheherlerara qatnaydighan poyizlardin bashqa, italiye, ispaniye we gérmaniyege qatnaydighan poyizlarmu tesirge uchrighan.
firansiye ishchilar uyushmisi konfédératsiyesi 1 – iyun 19 yadro éléktir istansisi we énérgiye séxlirida ish tashlash qarari élinghanliqini élan qilghan. bayanatta, 19 yadro éléktir istansisida éléktir ishlepchiqirishni toxtitish yaki hejimini töwenlitish telep qilinghan, shamal énérgiyesidimu oxshash usulni qollinish chaqiriq qilinghan.
yadro éléktir istansisiliridiki ish tashlash netijiside 125 ming aile éléktirsiz qaldi. firansiyeni keng kölemlik ish tashlash dolqunigha duchar qilghan yéngi ish qanuni layihesi, mart éyidin buyan dölet ichide eng köp talash – tartish peyda qilghan küntertip maddisi bolup qaldi. parlaméntqa sunulghandin tartip ishchilar uyushmisi bilen hökümet arisida otturigha chiqqan yirikchilikler, yéqinqi ikki heptide firansiyede kündilik turmushni palech ehwalgha chüshürüp qoydi. qanun layihesi testiqlanghan ehwalda künlük eng köp bolghanda 10 saet ishlesh tüzümi 12 saetke chiqidu. ish toxtamigha özgertish kirgüzüshni telep qilghanlarni ishtin chiqirish asanlishidu, yérim kün ishleydighanlarning heptilik ishlesh waqti 24 saettin töwenlitilidu, ismina qoshup ishligenlerge burunqidin az heq bérilidu.
ishchilar uyushmiliri hökümetning qanun layihesini qayturuwélishini, eksiche bolghanda keynige qaytmaydighanliqlirini bildürdi. qanun layihesi 8 – iyun kéngesh palatasigha sunulidu. ishchilar uyushmiliri bu waqitqiche hökümetke bésim qilishni pilan qilmaqta.
