süriye qozghilangchiliri söhbetni kéchiktürüshni qarar qildi
süriye qozghilangchiliri qurghan muzakire aliy komitétining, öz aldigha jenwede dawamlishiwatqan tinchliq söhbetlirini kéchiktürüshni qarar qilghanliqi bildürüldi.
türkiye awazi radiyosi xewiri: süriye qozghilangchiliri teshkil qilghan muzakire aliy komitéti heyiti, urush toxtitish kélishimige xilapliq qilish we insanperwerlik yardem buyumlirini ewetishning toxtap qalghanliqi sewebidin shiwéytsariyening jenwe shehiride ötküzülüwatqan tinchliq söhbetlirini öz aldigha kéchiktüridighanliqlirini qarar qildi.
muzakire aliy komitétining bu qarari, tinchliq söhbetlirining tonglitilghanliqi yaki muzakirelerdin chékinish menisige ige emes. mezkur qarar b d t süriye alahide wekili stifan démisturagha yetküzüldi. démistura söhbetni kéchiktürüsh qararini alghan muzakire aliy komitéti heyitining jenwede turidighanliqini, heyet bilen gheyri resmiy uchrishishlarning dawamlishidighanliqini bildürdi.
démistura helebte dawamlishiwatqan toqunushlarning urush toxtitish mesiliside chong endishelerni peyda qilghanliqini, emma nurghunlighan rayonlarda urush toxtitish kélishimige emel qilinghanliqini tekitlidi.
amérika pirézidénti barak obama bilen rusiye pirézidénti wladimir putin téléfonda, süriyediki urush toxtitish mesilisini muzakire qildi.
krémil sariyi élan qilghan bayanatta, süriyediki hemkarliqni kücheytish mesiliside pikir birliki hasil qilghan ikki rehberning, urush toxtitishni dawamlashturushqa küch chiqiridighanliqlirini bildürgenliki qeyt qilindi.
aqsaray élan qilghan bayanatta, obamaning féwral éyining axirida bashlanghan urush toxtitish kélishimining ehwaligha munasiwetlik endishelirini putingha yetküzgenliki eskertildi.
