seudi erebistan küreshchi ayropilanliri türkiyede

türkiye awazi radiyosi xewiri: seudi erebistan mudapie ministirliqi emeldari général ehmed bin hesen esiri, daéshqa qarshi küresh dairiside adanadiki injirlik herbiy bazisigha ewetilidighan küreshchi ayropilanlarning bazigha yétip barghanliqlirini bildürdi.

esiri el erbiye téléwiziye qanilining ziyaritini qobul qilip, ewetilgen küreshchi ayropilanlarning seudi erebistanning herbiy heriketlirige aktip halda qatnashturush mesiliside birdeklik hasil qilinghan qararning teqezzasi boyiche, amérika bashchiliqidiki xelqara ittipaqdash qisimlarning herbiy heriketliri dairiside süriyediki daéshq bazilirigha qarshi élip bérilghan herbiy heriketlerde wezipe öteydighanliqini eskertip, pat yéqinda injirlik herbiy bazisigha yenimu köp küreshchi ayropilanlarning ewetilidighanliqini éytti.

seudi erebistanning süriyediki daésh bazilirigha quruqluqtin herbiy heriket élip bérish toghruluq, amérika bashchiliqidiki ittipaqdash döletler bilen muzakirilerning dawamlishiwatqanliqini éytqan esiri, ittipaqdash döletlerning quruqluqtin herbiy heriket élish bérish mesilisige ijabiy qaraydighanliqlirini, élinidighan qararlar dairiside seudi erebistanningmu ittipaqdash qisimlarning quruqluqtin élip baridighan herbiy heriketliride aktip rol oynighusi barliqini buningdin ilgiri otturigha qoyghanliqini ipade qildi.

esiri bir soalgha qarita, süriyediki daésh bazilirigha quruqluqtin herbiy heriket élip bérish mesilisige türkiye bilen seudi erebistan yalghuz qarar bérelmeydighanliqlirini, bu mesilining amérika bashchiliqidiki ittipaqdash döletler bilen kéngesh qilip qarar bérishni pilanlighanliqlirini, türkiye bilen seudi erebistanning quruqluq herbiy heriketliride orun alidighanliqlirini alahide eskertip ötti.

küreshchi ayropilanlarning injirlik herbiy bazisigha orunlashturulushining quruqluq herbiy heriketlirige teyyarliq yaki emeslikige munasiwetlik bir soalgha qarita esiri, küreshchi ayropilanlarning hawa hujumliri üchün ewetilgenlikini bildürüp, quruqluq herbiy heriketlirige alaqidar xizmetlerning herbiy mutexessiler teripidin élip bériliwatqanliqini, bu heqtiki éniq melumatlarning pat yéqinda élan qilinidighanliqini éytti.