bash ministir ehmed dawutoghlu, xelqara jemiyet ajizliqining jawabkarliqini türkiyege artmasliqi lazim, dédi.

türkiye awazi radiyosi xewiri: gollandiyediki dölet ishliri ziyariti esnasida «PYD térrorluq teshkilati emes» dégüchilerge xitab qilghan dawutoghlu, «eger biri qoldiki bunche melumatlargha qarimay, PKK térrorluq teshkilati, lékin PYD térrorluq teshkilati emes dése, u halda semimiyetke qarap chiqishimizgha toghra kélidu» dédi.

bash ministir ehmed dawutoghluning küntertipide süriye mesilisimu bar idi. b d t ning türkiyege qilghan «chégrani échiwétinglar» dégen telipi bilen süriyege bolgha qarishini qattiq eyibligen dawutoghlu, «türkiye héchqachan chégrasini taqiwélip baqmidi. rusiyege ‹emdi yetsun› déyelmigenlerning türkiyege ‹chégralarni ach› dégendek tewsiyelerni qilishigha ikki yüzlimichilik, dep qaraymen. xelqara jemiyet ajizliqining jawabkarliqini türkiyege artip qoymasliqi kérek» dégenlerni qeyt qildi.

türkiyening tüp nishanining süriyeliklerni süriyediki lagérlargha orunlashturush ikenlikinimu eskertken bash ministir dawutoghlu, bu meqsette yéngi lagérlarning qurulghanliqini éytti. u, türkiyening süriyelik musapirlarni qobul qilishni dawamlashturidighanliqini, lékin süriyening démografik qurulmisi bilen birge türkiyening chégra boyliridiki démografik muwazinitining özgirip kétishige qetiy yol qoymaydighanliqinimu qeyt qildi.

dawutoghlu gollandiyediki ximiyelik qorallarni cheklesh merkizini ékskursiye qilghanda söz qilip, «bezi dölet bixeterlik doklatliri süriyede hélihem bashqa ximiyelik qoral zapaslirining barliqini körsitip bermekte. bu, 5 yilning mabeynide éghir insaniy tiragédiyeni bashtin kechürüwatqan süriye xelqi üchün zor bir xewptur» dédi.

bash ministir dawudoghlu türkiyening laheydiki turushluq bash elchisixanidimu 1979- yili térrorluq teshkilati asala teripidin shéhit qiliwétilgen türkiyening eyni chaghdiki laheyde turushluq bash elchisi özdemir benlerning oghli ehmet benlerning xatire téshini ziyaret qildi.

kech terepte gollandiyediki türklerning wekilliri bilen körüshken ehmed dawutoghlu ularni süriyeliklerge yardem qolini sonushqa chaqirdi.