تۆرکیأنینگ حاق- حقوقلاری نینگ و بأحبیتلری نینگ قوُرالماغیندا اِگیلشیک ادیلمه‌ز
میللی حوُوپسوزلیق گنگه شی أردوُغان ینگ یوُلباشچیلیغیندا ماصلاحات گچیردی
تۆرکیأنینگ جمهورباشلیغی رجب طیب أردوُغان ینگ یوُلباشچیلیغیندا گچیریلن میللی حوُوپسوزلیق گنگه شی نینگ ییغناغیندان سوُنگ جارناما چاپ ادیلدی.
جارنامادا پ. ک. ک/ ک. ج. ک- پ. ی. د/ ی. پ. گ، فتؤ و داعش یالی ترور قورامالاری نینگ باشدا دورماغیندا میللی جبیسلیگه و بیتِولیگه، تۆرکیأنینگ گلجگینه حوُوپ سالیان أهلی ترور قورامالارینا قارشی یوردونگ ایچینده و سرحت آشا قورالیان حرکتلر حاقیندا میللی حوُوپسوزلیق گنگه شینه ماغلومات بریلندیگی نیغتالدی.
گۆن دوُغار آق دنگیز مسئله سینده دارتغینلیغینگ یوُقارلاماغینا سبأپ بوُلیان آکتورلارینگ ادیأن تاغاللالاری دا آرا آلینیپ ماصلاحاتلاشیلدی.
جارنامادا، تۆرک حالقی نینگ شو گۆنکی گۆنه چنلی بوُلشی یالی موندان سوُنگ هم قوری یردأکی، دنگیزدأکی و هوُواداقی أهلی حاق- حقوقلاری نینگ و بأحبیتلری نینگ قوُرالماغیندا اگیلشیک ادیلمه جکدیگی ینه بیر گِزه ک نیغتالدی.
جارنامادا آدالارینگ یاراغلانماغی نینگ باشدا دورماغیندا حالقارا حقوغینا و شرطنامالارا لاییقلیقدا حرکت اتمه یأن یورتلارا پاراساتلیلیق چاغیریشی بریلدی، بؤلگأنینگ طبیغی بایلیقلاری نینگ عادالاتلی یاغدایدا پایلاشیلماغی مسئله سینده تۆرکیأنینگ أهلی پلاتفرمدا و ایلکینجی نوُباتدا دیالوگا قوُلداو بریأندیگی بیلدیریلدی.
جارنامادا "بؤلگه آرا و حالقارا دۆشنۆشمه‌زلیکلرده همیشه عادالاتینگ و دوُغری نینگ یانیندا یر آلان تۆرکیأنینگ، گۆن دوُغار آق دنگیز مسئله سینده هم شوُل چأکده حرکت ادندیگی نیغتالیپ، اوروپا بیله له شیگی نینگ باشدا دورماغیندا أهلی قورامالارا و دۆشنۆشمه‌زلیگه دگیشلی بوُلان دؤولتلره، یوردونگ و دمیرقازیق قبرس تۆرک جمهوریتی نینگ حاق حقوقلارینا و بأحبیتلرینه صارپا قوُیماقلاری اۆچین" چاغیریش بریلدی.
جارنامادا تۆرکیأنینگ سوریه و لیبی نینگ دورنوقلیلیغینا و شوُل یورتلاردا پاراحاتچیلیغینگ یوُلا قوُیولماغینا قوُلداو برمأگه دوُوام اتجکدیگی یاتلادیلدی.
