نعمان قورتولموش اؤزبگیستان دا

تۆرکیأنینگ بیک میللت مجلیسی نینگ باشلیغی نعمان قورتولموش رسمی ساپار بیلن اؤزبگیستان ینگ پایتاغتی داشکنت ده بوُلیار.

نعمان قورتولموش اؤزبگیستان ینگ یوُقاری مجلیسی نینگ باشلیغی نورالدین جان اسماعیلوف بیلن دوشوشدی.

قورتولموش بو دوشوشیغیندا اؤزبگیستان ینگ جمهورباشلیغی شوکت میرضیایووینگ یوُلباشچیلیغیندا بیر اؤزگِرتمِه اتابی نینگ گچیریلیأندیگینی و قوُوی ایشلرینگ آلیپ باریلیاندیغی آیتدی.

تۆرکیأنینگ بیک میللت مجلیسی نینگ باشلیغی بو اتاپدا اؤزبگیستان ینگ بیلیم، صونغات، ادبیات و مدنیتده اولی اؤسۆش اتمه گینی اومیت ادیأندیگینی نیغتادی.

تۆرکیه بیلن اؤزبگیستان ینگ آراسیندا اؤرأن قوُوی بیر قاتناشیغینگ باردیغینی آیدان قورتولموش اؤزآرا سؤودا- تیجارت دوُلانشیغینی 10 میلیارد دلارا یتیرمه ک بیلن باغلانشیقلی ایکی یوردونگ یوُلباشچیسی نینگ ایسله یأن ماقصادی نینگ مۆمکین بوُلاندیغینی آیتدی.

اوُرتاآسیادان آناتولی و بالکان یورتلارینا چنلی بوُلان جغرافیادا تۆرک دۆنیأسی نینگ قاتناشیقلاری و دوُستلوغینی یوُقارلاتماغینگ أهمیتینه اۆنس چکن قورتولموش مونونگ گلوبال پاراحاتچیلیغینگ یوُلا قوُیولماغی اۆچین اولی پورصات دؤره‌تجِکدیگینی بیلدیردی.

تۆرکیه بیلن اؤزبگیستان ینگ یاقین حیذماتداشلیغینی یوُقارلادیپ تۆرک دۆنیأسی نینگ اؤسۆشینه قوُشانت قوُشجاقدیغینی آیدان نعمان قورتولموش، ایکی یوردونگ پارلمانلاری نینگ آراقاتناشیغی نینگ أهمیتینی یاتلاتدی.

تۆرکیأنینگ مجلیسی نینگ باشلیغی دمیرقازیق قبرس تۆرک جمهوریتی نینگ تۆرک دؤولتلری قوراماسینا سینچی بوُلماغی اۆچین اؤزبگیستان دان قوُلداوا قاراشیاندیقلارینی دا آیتدی.

اؤزبگیستان ینگ یوُقاری مجلیسی نینگ باشلیغی اسماعیلوف دا تۆرکیه بیلن اؤزبگیستان ینگ آراقاتناشیغی نینگ ییل‌سایین یوُقارلاماغینا بگنچ بیلدیردی و قاتناشیقلارینگ اؤسۆشینده پارلمان آرا حیذماتداشلیغینگ أهمیتلیدیگینی بیلدیردی.