“Aýlag Ýurtlary Bilen Edýän Hyzmatdaşlygymyzy Ösdürmek Üçin Tagalla Edýäris"

Prezident Erdogan Katara gitmeden ozal Stambul şäherindäki Atatürk howa menzilinde geçiren metbugat ýygnagynda, Türkiýe-Katar gatnaşyklarynyň, dostluk bilen, strategik perspektiwa bilen günsaýyn özgerýändigini, soňky ýyllarda uly sepgide ýetilendigini beýan etdi. 

Türkiýäniň we Kataryň berk pozisiýalaryny goraýan iki döwletdigini aýdan Erdogan, Katar bilen ykdysadyýetden goranyşa, söwdadan maýa goýuma çenli girdeji al-girdeji al ýörelgesine laýyklykda hyzmaydaşlyklaryny güýçlendirýändiklerini habar berdi. 

Türkiýäniň Katar bilen birlikde Pars aýlagy ýurtlary bilen hyzmatdaşlyklaryny ösdürmek üçin tagalla edýändiklerini aýdan Erdogan: "Pars aýlagynda dialog gapylarynyň ýaňadandan açylmagy we ýalňyş düşünişmezçilikleriň ortadan aýrylmagy ugrunda alynyp barylýan diplomatik tagallalary hoşallyk bilen kabul edýäris. Türkiýe hökmünde Pars aýlagy ýurtlary bilen jebisligimizi, raýdaşlygymyzy, mundan soňky gatnaşyklarymyzy has hem güýçlendirip dowam etdirmegiň tarapdarydyrys" diýip mälim etdi. 

Prezident Erdogan metbugat ýygnagyndan soň Katara tarap ýola çykdy. 

Prezident Erdogan paýtagt Dohada Kataryň Emiri Şyh Temim Bin Hamed Al Sani tarapyndan resmi dabara bilen garşylanar.

Liderler garşylama dabarasyndan soň özara duşuşyk geçirerler.

Duşuşykda Türkiýe bilen Kataryň arasyndaky özara gatnaşyklar ähli taraplaýyn ara alnyp maslahatlaşylar.

Erdogan bilen Al Sani Owganystan, Siriýa we Liwiýa ýaly halkara meseleler hakynda hem pikir alyşar.

Prezident Erdoganyň resmi saparynyň çäginde Türkiýe-Katar ýokary derejeli hyzmatdaşlyk geňeşiniň 7-nji maslahaty geçirler.

Iki ýurdyň arasynda ilkinjisi 2015-nji ýylda geçirilen komitet maslahatlarynyň netijesinde söwdadan energetika, goranmakdan senagata çenli ençeme ugur boýunça 62 ylalaşyk baglaşyldy. 

Prezident Erdogan we Al Sani tarapyndan ýolbaşçylyk ediljek 7-nji maslahatda biri-birinden tapawutly ugurlar boýunça ylalaşyklaryň baglaşylmagyna garaşylýar.