Türkiýe Gresiýanyň Daşary işler ministri Nikos Dendiasa reaksiýa bildirdi

Türkiýäniň Daşary işler ministrliginiň metbugat geňeşçisi Hami Aksoý, Günbatar Frakiýadaky türk azlyklaryna garşy edýän assimilýasiýanyň we basyş syýasatynyň netijesinde, Ýewropanyň Adam hukuklary kazyýeti tarapyndan özüne garşy 3 aýry gezek duýduryş berilen Gresiýanyň Daşary işler ministri Nikos Dendiasyň azlyklar babatynda Türkiýäni tankyt etmeginiň tragikomikidigini beýan etdi.

Daşary işler ministrliginiň metbugat geňeşçisi Hami Aksoý, Dendiasyň Türkiýedäki grek azlyklary bilen bagly soragyna ýazmaça jogap berdi. Hami Aksoý: "Günbatar Frakiýadaky türk azlyklaryna garşy edýän assimilýasiýanyň we basyş syýasatynyň netijesinde, Ýewropanyň Adam hukuklary kazyýeti tarapyndan özüne garşy 3 aýry gezek duýduryş berilen Gresiýanyň Daşary işler ministri Nikos Dendiasyň azlyklar babatynda Türkiýäni tankyt etmegi tragikomikidir" diýip nygtady. 

Türkiýede soňky ýyllarda grek Ortodoks azlygynyň meseleleriniň çözgüdi bilen bagly ençeme konstruktiw ädimiň, grek Ortodoks raýatlar bilen bilelikde durmuşa geçirilendigini ýatladan Aksoý, Günbatar Frakiýadaky türk azlyklaryň meseleleri babatynda bolsa Ýewropa Bileleşigine agza bolan we özüne demokratiýanyň merkezi hökmünde garaýan Gresiýada öňe gidişligiň dälde, tersine yza gaýdyşlygyň bardygyny habar berdi. 

Hami Aksoý, Gresiýanyň Günbatar Frakiýadaky türk azlyklarynyň Lozanna parahatçylyk ylalaşygy we köptaraplaýyn ylalaşyklardan gözbaş alýan hukuklarynyň düzgünlerini dowamly ýagdaýda bozýandygyny belläp geçdi. 

Günbatar Frakiýadaky medreselere garşy soňky eden-etdilikleriň Gresiýada indi türk sözüne däl, eýsem azlyk sözüne hem çydam edilmeýändigini görkezendigini aýdan Aksoý: "Türkiýe grek Ortodoks raýatlarynyň talabyna laýyklykda Gökçeadada diňe 4 okuwçy üçin mekdep açan bolsa, Gresiýa Günbatar Frakiýadaky azlyk mekdeplerini ýapmaga dowam edýär. Soňky 25 ýylda Günbatar Frakiýadaky azlyklaryň mekdep sanynyň Gresiýa tarapyndan 231-den 115-e çenli azaldylmagy iki ýurdyň azlyklara bolan garaýşynyň iň anyk görkezijisidir. Gresiýanyň Daşary işler ministri bular ýaly elhenç beýanatlary bermeden ozal ilki aýna seretmelidir we öz öýüniň öňüni süpürmelidir" diýip nygtady.