Kalyn: "Hafteri goldaýanlar Liwiýadaky çaknyşygyň ýalňyş tarapynda" diýdi

Prezidentiň Metbugat sekretary Ibrahim Kalyn, Fransiýa we entegem Hafteri goldaýan taraplaryň ählisiniň, Liwiýadaky çaknyşygyň ýalňyş tarapyndadygyny belledi. 

Ibrahim Kalyn, Liwiýada başdan geçirilýän soňky hadysalar bilen bagly France 24 kanalyna beýanat berdi. 

Huntaçy Hafteriň Liwiýanyň halkynyň kanuny wekili bolmandygyny aýdan Kalyn, Hafteriň Pars aýlagy ýurtlaryndan, Russiýada we ýene-de birnäçe ýurtdan alýan goldawy bilen Liwiýadaky ýagdaýy has hem dartgynlaşdyrýandygyny we bu ýurdy has hem batyrýandygyny habar berdi. 

Ibrahim Kalyn, halkara guramalar tarapyndan ykrar edilen Liwiýanyň Ylalaşyk hökümetiniň Premýer ministri Faýiz es-Serrajyň ýolbaşçylygyndaky hökümetiň iň başyndan bäri örän jogapkärli we konstruktiw çemeleşendigini, parahatçylyk ylalaşygynyň düzgünlerini berjaý edendigini we halkara guramalar bilen bilelikde hereket edendigini mälim etdi. 

Liwiýa Sudandan, Çatdan we Siriýadan iberilen hakyna tutma esgerler bilen merkezi Russiýada ýerleşýän Wagner toparynyň Hafteriň düzüminde söweşýändigini aýdan Kalyn: "Indi bolsa Haftere goldaw berýänler munyň bir çözgüt däldigini we mundan soň dowam etmejekdigine göz ýetirdiler. Serrajyň ýolbaşçylygyndaky hökümet, eýýäm ençeme gezek harby çözgüt däl, eýsem syýasy çözgüt isleýändiklerini bellediler, emma olaryň özlerine goramaga hukugy bar" diýip nygtady.