Şwesiýada koronawirus keseline ýolugan türk raýaty Türkiýä getirildi

Şwesiýanyň Malmýu şäherinde koronawirus keseline ýolugandygyna garamazdan bejerilmän öýüne ugradylan 47 ýaşly Emrullah Gülüşken üç çagasy bilen bilelikde Saglygy goraýyş ministrliginiň tiz kömek uçary bilen Türkiýä getirildi.

Malmýu Sturup howa menziline gonan tiz kömek uçary ýerli wagt boýunça 09:00-da Emrullah Gülüşken bilen çagalary Esmany, Samirany we Mahmudy alyp, Türkiýä uçdy.

Emrullah Gülüşkeniň Şwesiýada galan gyzy Leýla Gülüşken türk resmileriniň habary eşidenden soň özlerine telefon edendigini nygtap: “Onlarça resmi telefon etdi. Saglygy goraýyş ministri Fahrettin Koja bize gysga möhletde uçar ugratdy. Ýurdumyz bizi buýsandyrýar” diýdi.

Batman welaýatynyň Gerjüş etrabyndan Şwesiýa gelendiklerini gürrüň beren Gülüşken, türk döwletiniň özlerine eýe çykandygyny nygtap: “Pursatdan peýdalanyp Prezidentimiz R.T.Erdogana, Saglygy goraýyş ministrimiz Fahrettin Koja, Türkiýäniň Şwesiýadaky İlçisi Hakky Emre Ýunta, Adalat we ösüş partiýasynyň halk deputaty Zafer Sarykaýa, Daşary ýurtlardaky türkler we garyndaş halklar edarasynyň Başlygy Abdullah Erene we Halkara demokratlar bileleşiginiň Şwesiýadaky wekili Özer Ekene sagbolsun aýdýaryn” diýdi.

Koronawirus hassalygyna ýolugandygyna garamazdan bejerilmän öýüne ugradylan 47 ýaşly Emrullah Gülüşkeniň gyzy Samira Gülüşken sosial mediada: “Maşgalamyz bilen Şwesiýada ýaşaýarys. Kakamyň 11 gün ozal gyzgyny galyp, demi gysmaga başlady. Aladalanyp hassahana telefon etdik. Gynansagam gelmediler we bizi güýmediler. Günde ençeme gezek telefon etdik, emma bize jaň etmediler” diýip ýazypdy.

Saglygy goraýyş ministri Fahrettin Koja Samira Gülüşkene telefon edip, Emrullah Gülüşkeniň 4 çagasy bilen Türkiýä getirilmegi üçin tiz kömek uçarynyň ugradylmagy üçin görkezme beripdi.