Türk metbugatynyň gysgaça mazmuny

Sabah gazedi: "Erdogan umumy metbugat ýygnagynda beýan etdi: 24-nji martda taryhy sammit" söz başyly habarynda, Prezident Rejep Taýýip Erdoganyň, düýn Polşanyň Prezidenti Andžeý Duda bilen Ankara şäherinde geçiren umumy metbugat ýygnagynda, 24-nji martda Belgiýanyň paýtagty Brýussel şäherindäki NATO agza ýurtlaryň Liderler maslahatyna gatnaşjakdygyny, sammitde Russiýa-Ukraina arasyndaky tapgyr bilen baglanşykly gepleşikler geçirjekdigini aýdandygyny okyjy köpçüliginiň dykgatyna ýetirýär.

Haber Türk gazedi: "Çawuşogly rus kärdeşi Lawrow bilen duşuşyk geçirdi" söz başyly habarynda, Daşary işler ministri Mewlüt Çawuşoglynyň düýn Russiýada kärdeşi Sergeý Lawrow bilen duşuşyk geçirendigini habar berýär. Mariupol şäherinde ewakuasiýa işleriniň dowam edýändigini aýdan Çawuşogly, şu günki güne çenli 15 müň türk raýatynyň ewakuasiýa edilendigini beýan etdi.

Watan gazedi: "Ministr Akar Kanadanyň Goranmak ministri bilen duşuşyk geçirdi" söz başyly habarynda, Milli Goranmak ministri Hulusi Akaryň, düýn Belgiýanyň paýtagty Brýussel şäherindäki NATO ştabynda Kanadanyň Goranmak ministri Anita Anand bilen duşuşyk geçirendigini aýan edýär. Duşuşykda ikitaraplaýyn we sebitleýin goranyş we howpsuzlyk bilen goranyş senagatyndaky hyzmatdaşlyk mümkinçilikleri barada pikir alyşyldy.

Ýeni Şafak gazedi: "Ministr Dönmez: 2030-njy ýylda elektrik tokda ýa-da gibrid görnüşli 1 million awtoulagy ýollarda göreris" söz başyly habarynda, Energetika we tebigy serişdeler ministri Fatih Dönmeziň düýn beren beýanatynda, 2030-njy ýylda Türkiýede elektrik tokda ýa-da gibrid görnüşli takmynan 1 million ulagyň ýollarda boljakdygyny we onuň üçin infrastrukturanyň güýçlendirilmeginiň gerekdigini aýdandygyny mälim edýär.

Star gazedi: "Ýerli sanjym TURKOWAK-dan buýsandyran habar" söz başyly habarynda, koronawirus epidemiýasyna garşy ýerli sanjymy oýlap tapan Erjiýes uniwersitediniň Sanjym derňew we özgerdiş gollanma merkeziniň müdüri Prof.Dr. Aýkut Özdarendeliniň, TURKOWAK sanjymynyň Kowid-19-yň Omikron görnüşine garşy hem gowy goraýandygyny aýdandygyny habar berýär.