Türk metbugatynyň gysgaça mazmuny

“Hürriýet” gazeti “Saglygy goraýyş ministri Koja: Raýatlarymyz aladalanmasyn, düzgünleri berjaý etsinler” söz başyly habarynda, Saglygy goraýyş ministri Fahrettin Kojanyň düýn sosial media hasaby Twitterden beren habarnamasynda Türkiýede bardygy ýüze çykarylan “Omikron” warianty sebäpli raýatlaryň aladalanmaly däldigini, düzgünleri berjaý etmegiň möhümdigini nygtap: “Raýatlarymyz sanjymlaryny tamamlasynlar” diýendigini ýazýar.

“Watan” gazeti “Ministr Karaismailogly buşlady” söz başyly habarynda, Ulaglar we infrastruktura ministri Adil Karaismailoglunyň düýn paýtagt Ankarada Türkiýäniň Beýik Millet Mejlisinde sözlän sözünde 2022-nji ýylda elektrik togy bilen işleýän milli otlynyň ulanmaga beriljekdigini buşlandygyny okyjy köpçüliginiň dykgatyna ýetirýär.

“Star” gazeti “Ýewraziýa tuneline Türkiýäni buýsandyran baýrak” söz başyly habarynda, Stambulyň “Ýewraziýa” tuneliniň Britaniýada 50 ýyldan bäri gurluşyk we binagärçilik pudagynda neşirleri çap edýän we her ýyl dünýäniň iň gowy tunel tejribelerini sylaglaýan “Täze raýat inženerçiligi” žurnaly tarapyndan innowasiýa baýragyna laýyk görülendigini mälim edýär.

“Haber Türk” gazeti “Zeýtun we zeýtun ýagy pudagynda ABŞ-na rekord eksport” söz başyly habarynda, Türkiýäniň zeýtun we zeýtun ýagy eksportunyň noýabr aýynda geçen ýylyň degişli döwrüne görä 21,9 göterim artyp, 30,7 million dollara barabar bolandygyny aýan edýär. Pudak, eskportda esasy orny eýeleýän ABŞ-na degişli döwürde 7,5 million dollarlyk eksport amala aşyrdy.

“Sabah” gazeti “Hitit döwründen galan dört tablet İzmirde sergilenýär” söz başyly habarynda, İzmirde Bogazköý gazuw agtaryşlarynda tapylan Hitit döwrüne degişlidigi anyklanan 4 tapletiň İzmiriň Arheologiýa muzeýinde sergilenýändigini ýazýar. Hitit imperiýasynyň “mukaddes toý”, “baýramçylyk”, “jadylanma” ýaly dabaralaryny suratlandyrýan 3,500 ýyllyk tabletler gelenleriň ünslerini özünde jemleýär.