Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Star” gazeti “Erdogan: DAİŞ bilen gönüden çaknyşýan ýeke-täk NATO ýurdy biz” söz başyly habarynda, Prezident R.T.Erdoganyň G20-niň sammitine gatnaşan liderlere ýüzlenip: “Ýeke galandygymyza garamazdan şu günki güne çenli 9 müňe barabar terrorçy-söweşijini ele saldyk we ýurtlaryna ugratdyk. Siriýada DAİŞ-e garşy gönüden çaknyşan NATO agza ýeke-täk ýurt biz” diýendigini ýazýar.
“Watan” gazeti “Milli Goranmak ministrliginiň Ygtyýarnama hakyndaky beýannamasy” söz başyly habarynda, Milli Goranmak ministrliginden berilen beýannamada Azerbaýjana harby goşun ugratmak hakyndaky Ygtyýarnama barasynda: “Türk esgerleri Russiýa bilen dörediljek bilelikdäki merkezde we şol merkeziň ýerine ýetirjek işlerinde 1 ýyl möhlet bilen iş alyp barar” diýilýändigini okyjy köpçüliginiň dykgatyna ýetirýär.
“Sabah” gazeti “Nemes metbugaty: “Ýewropa ýurtlary Türk ÝUHU-laryna garşy durup bilmez” söz başyly habarynda, Germaniýada çap edilýän “Taggeşau” habarlar saýtynyň Türk ýaragly uçarmansyz howa ulaglary hakynda magtawly habar çap edip, Azerbaýjan bilen Ermenistanyň arasyndaky dartgynlykda Türkiýäniň beren ýaragly uçarmansyz howa ulaglarynyň Azerbaýjanyň ýeňişine uly goşant goşandygyny nygtap: “Häzirki wagtda Ýewropa ýurtlarynyň eýe bolan howa goranyş ulgamlarynyň hiç haýsynyň türk ÝUHU-laryna garşy durup bilmejekdigini ýazandygyny mälim edýär.
“Hürriýet” gazeti “Synagdan geçdi… Ilki “SOM” raketalary ulanylar” söz başyly habarynda, Senagat we tehnologiýalar ministri Mustafa Warankyň Kale ylmy-barlag we kämilleşdiriş merkezi tarapyndan öndürilen Milli turbožet hereketlendirijisini synagdan geçirendigini ýazýar. Gazet ministr Warankyň “Kele tarapyndan öndürilen we enşalla ýakyn gelejekde gowşuryljak hereketlendiriji bilen ýurdumyzda uly isleglerden biri kanagatlandyrylar” diýen sözlerini çap edýär.
“Ýeni Şafak” gazeti “ABŞ-da ýaşaýan 12 ýaşly türk çagasy küştde dünýä boýunça ilkinji 100-lüge goşuldy” söz başyly habarynda, ABŞ-da ýaşaýan 12 ýaşly türk Kagan Uzuň öz ýaş toparynda küştde dünýä boýunça ilkinji ýüzlüge girendigini, 6 ýaşynda küşt oýnamagy öwrenen Kagan Uzuň “Küştde ussatlaşmak isleýärin” diýendigini ýazýar.
