Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Haber Türk” gazeti “PKK/ÝPG terrorçylary Daglyk Garabagdan çykmaly” söz başyly habarynda, Türkkiýäniň ermeni terrorçylary bilen hyzmatdaşlyk edýän PKK/ÝPG terrorçylarynyň dessine Daglyk Garabagdan çykmagy boýunça duýduryş berendigini ýazýar. Gazet Milli goranmak ministrliginden berilen beýannamada; “Bigünä ilaty nyşana alýan ermeni terrorçylary bilen hyzmatdaşlyk edýän PKK/ÝPG terrorçylary dessine sebitden çekilmeli” diýilýändigini okyjy köpçüliginiň dykgatyna ýetirýär.
“Hürriýet” gazeti “Türkiýe bilen Gresiýanyň arasynda geçiriljek maslahat yza süýşürildi” söz başyly habarynda, Türkiýe bilen Gresiýanyň arasynda şu gün NATO-nyň Ştab kwartirasynda geçirilmegi meýilleşdirilen tehniki maslahatyň iki ýurduň bilelikdäki kararyna laýyklykda birnäçe gün yza süýşürilendigini mälim edýär. Habarda Gündogar Ortaýer deňizindäki ulaglaryň işlerini howpsyz alyp barmagyny üpjün etmek maksady bilen geçiriljek utgaşyklygyň tehniki detallary hakynda pikir alyşyljak maslahatyň şu gün NATO-nyň Ştab kwartirasynda geçirilmeginiň meýilleşdirilendigi, maslahatyň tehniki sebäplerden iki tarapyň kararyna laýyklykda birnäçe gün yza süýşürilendigini okyjy köpçüliginiň dykgatyna ýetirýär.
“Watan” gazeti “Türkiýe Fransiýa berk reaksiýa bildirdi” söz başyly habarynda, Türkiýäniň Fransiýanyň Prezidenti Emmanuel Makronyň 9-njy dekabrda Ministrler kabinetiniň garamagyna hödürlenjek ekstremizme garşy göreş kanunyna berk reaksiýa bildirendigine ünsleri çekýär. Daşary işler ministrliginden berilen beýannamada: “Manysy parahatçylygy bolan beýik dinimizi wagyz etme bahanasy bilen ýalňyş hem-de ýoýulan çemeleşmelere degişli etmäge hiç kimiň haky ýokdur” diýilýär. Beýannamada: “Yslam dinini hamala wagyz etmek bahanasy bilen “Ýewropanyň Yslamy”, “Fransiýanyň Yslamy” ýaly adalgalary öňe sürüp, migrant jemagatlara gözegçilik etmegi nazarda tutmak gumanitar we hukuk kadalaryny bozmak manysyny aňladýar” diýilýär.
“Ýeni Şafak” gazeti “Diýarbakyrdan İtaliýa gidýän nygmat: “Kakadylan pomidor” söz başyly habarynda, Diýarbakyrdan hiç hili himiki madda goşulmadyk organiki pomidoryň giň meýdanda guradylandan soň İtaliýa eksport edilýändigini ýazýar. Gazet diýarbakyrly daýhanlaryň öndüren pomidorynyň italian aşhanasynyň saýlama nygmatlarynyň hataryna goşulýandygyny mälim edýär.
“Star” gazeti “ Türkler Fransiýada şou görkezdi, Lille liderlige göterildi” söz başyly habarynda, Fransiýanyň 1-nji ligasynda 6-njy hepdäniň bäsleşiklerinde Lilläniň öz meýdançasynda Strazburgy 3-0 hasabynda utandygyny okyjy köpçüliginiň dykgatyna ýetirýär. Habarda bäsleşikde türk futbolçylary Burak Ýylmazyň we Zeki Çeligiň ussatlarça oýnap, her haýsynyň bir gol geçirendigi nygtalýar.
