Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Haber Türk” gazeti “Erdogan Ýewropa Gündogar Ortaýer ýüzlenmesi: Adalatly we ygrarly boluň” söz başyly habarynda, Prezident R.T.Erdoganyň Germaniýanyň Federal Kansleri Angela Merkel bilen geçiren wideokonferensiýa görnüşinde geçiren duşuşygynda, Gündogar Ortaýer deňizi meselesinde oňyn we adalatly çemeleşme bilen düşnüşmezlikleriň gepleşikler hem-de ylalaşyk arkaly çözülip bilincekdigini aýdandygyny ýazýar. Gazet Ýewropa ýurtlarynyň Gündogar Ortaýer deňizi meselesinde adalatly we ygrarly bolmalydygyna ünsi çeken Erdoganyň, Türkiýäniň hukuklary boýunça egilşiksiz we işceň syýasat alyp barmaga dowam etcekdiklerini nygtandygyny mälim edýär.
“Ýeni Şafak” gazeti “Oruç Reisiniň” täze ugry Meýsiň günortasy” söz başyly habarynda, soňky bir aýda yglan edilen üç Nawteks bilen Türkiýäniň deňiz ygtyýar giňişlikleriniň iň günorta çäkden başlap, demirgazyga tarap gelen “Oruç Reis” gämisiniň abatlaýyş işlerinden soňky ugrunyň Meýs adasynyň günortasy bolcakdygyna ünsleri çekýär. Habarda “Oruç Reis” gämisiniň sebitdäki gözleg işlerini 2 aýyň dowamynda tamamlacakdygy aýan edilýär.
“Star” gazeti “Demirgazyk Makedoniýadan Gresiýa Türkiýe bilen hyzmatdaşlyk çagyryşy” söz başyly habarynda, Demirgazyk Makedoniýanyň Premýer ministri Zoran Zaewiň resmi Afyna Gündogar Ortaýer deňizi meselesinde Türkiýe bilen hyzmatdaşlyk etmäge çagyryş edendigini okycy köpçüliginiň dykgatyna ýetirýär. Sebitdäki ýurtlaryň arasyndaky gowy gatnaşyklaryň möhümdigine ünsi çeken Zaew: “Akylly bolalyn. Men şeýle dartgynlygyň gaýtalanmazlygyny tama edýärin. Çünki Türkiýe siziň goňşyňyz we biziňem dostumyz” diýdi.
“Sabah” gazeti “Dünýäni geň galdyran dron sürüsi üçin ünsler Türkiýede” söz başyly habarynda, Prezidentiň ýanyndaky Goranyş senagaty edarasynyň Dron sürüsi tehnologiýasy taslamasynyň çäginde geçiren bäsleşiginiň birinci tapgyrynyň tamamlanandygyny, uçuş synaglaryna köp sanly firmanyň gatnaşandygyny okycy köpçüliginiň dykgatyna ýetirýär. Gazet Raýat goranyş edarasynyň Başlygy Ismail Demiriň türk goranyş senagatynyň soňky ýyllarda dronlar boýunça uly üstünlikler gazanandygyny, milli we ýerli dronlaryň dünýäde öz ugrunda belli ulgamlaryň hataryna goşulandygyny aýdandygyny ýazýar.
“Hürriýet” gazeti “Ruslar Antalýa uly isleg bildirýär” söz başyly habarynda, koronawirus epidemiýasynda kadalaşma tapgyrynyň başlamagy bilen birlikde Russiýanyň başda durmagynda Antalýa gelýän syýahatçy sanynyň artýandygyna ünsleri çekýär. Habarda Antalýa awgust aýynda cemi 225 müňe barabar bolan syýahatçy sanynyň, senýabr aýynyň 15 gününde şol mukdara ýetendigi mälim edilýär.
