Türk metbugatynyň gysgaça mazmuny

Hürriýet gazedi: "Erdogan bilen Merkel Liwiýa meselesini ara alyp maslahatlaşdylar" söz başyly habarynda, Türkiýäniň Prezidenti Rejep Taýýip Erdoganyň Germaniýanyň Federal Kansleri Angela Merkel bilen telefon arkaly söhbetdeş bolandygyny habar berýär. Liderler söhbetdeşligiň barşynda Gündogar Ortaýer deňizindäki soňky hadysalar we Liwiýa başda bolmak bilen, sebitleýin meseleler, koronawirus epidemiýasyna garşy göreş, epidemiýadan soňky etapda ediljek ädimler we ikitaraplaýyn gatnaşyklary ara alyp maslahatlaşdylar. Erdogan we Merkel Liwiýada syýasy çözgüt üçin BMG-nyň ýolbaşçylygyndaky etabyň güýçlendirilmegi babatynda ylalaşyk gazandylar. 

Haber Türk gazedi: "Türkiýe mugt bejergi edýän dünýäniň seýrek ýurtlarynyň biri" söz başyly habarynda, Gazna we Maliýe ministri Berat Albaýragyň Türkiýäniň mugt bejergi edýän dünýäniň seýrek ýurtlarynyň biridigini aýdandygyny mälim edýär. Ministr Albaýrak Twitter hasabyndan beren beýanatynda: "Güçli ykdysady gurluşymyzyň saýasynda ähli raýatlarymyza mugt bejergi hödürleýän dünýäniň seýrek ýurtlarynyp biridiris" diýip belledi. 

Ýeni Şafak gazedi: "Ýerli derman işlerinde öňe gidişlikler edilýär" söz başyly habarynda, Senagat we tehnologiýa ministri Mustafa Warankyň, Kovid-19-a garşy ýerli derman oýlap tapmak bilen bagly taslamanyň çäginde Ankara uniwersitetindäki laboratoriýada dowam edýän işlere ýakyndan gözegçilik edendigini okyjy köpçüliginiň dykgatyna ýetirýär. Ministr Mustafa Warank, derman taslamasynyň çäginde, haýwanlarda geçirilýän synag tapgyryna geçilendigini aýan etdi. Warank kliniki şertlerdäki synaglar tamamlananyndan soň bolsa dermanyň Saglygy goraýyş ministrligine beriljekdigini beýan etdi. 

Sabah gazedi: "Kovid-19 anyklaýyş testinde dünýäde ilkinji gezek" söz başyly habarynda, Senagat we tehnologiýa ministriniň orunbasary Hasan Büýükdereniň, sanjymda adaty bolan usullar bilen birlikde, dünýäniň hiç bir ýurdunyň synagdan geçirmedigi täze tehnologiýalary synagdan geçirýändiklerini aýdandygyny habar berýär. "Özgerden ýokary antitelaly plazmany kesellän adamlaryň bejergilerinde ulanýarys" diýen Büýükdere, anyklaýyş testlerinde nano-tehnologiýany esas alan we dünýäde ilkinji boljak täze bir önümi özgertmäge synanyşýandyklaryny aýan etdi. 

Watan gazedi: "Onur Air uçar saparlaryna başlaýar" söz başyly habarynda, koronawirus epidemiýasy sebäpli uçar saparlaryna arakesme bermäge mejbur bolan Onur Air howaýollary kärhanasynyň, 26-njy iýundan başlap içerki uçar saparlaryna, 15-nji iýuldan başlap bolsa daşary ýurt uçar saparlaryna başlajakdygyny aýdandygyny okyjy köpçüliginiň dykgatyna ýetirýär. Kärhana tarapyndan berilen beýanatda, petekleriň satylmaga başlanandyga ünsler çekildi.