Türk metbugatynyň gysgaça mazmuny

Haber türk gazedi: "Prezident Erdogan, DKTR-nyň Premýer ministri bilen söhbetdeş boldy" söz başyly habarynda, Türkiýäniň Prezidenti Rejep Taýýip Erdoganyň, DKTR-nyň Premýer ministri Ersin Tatar bilen telefon arkaly söhebetdeş bolandygyny habar berýär. Kommunikasiýalar edarasyndan berilen beýanata görä, Prezident Erdogan telefon söhbetdeşliginde, Türkiýäniň DKTR-e goldawynyň koronawirusa garşy göreş etabynda dowam etjekdigini habar berdi. Telefon söhbetdeşliginde mundan başgada, ikitaraplaýyn gatnaşyklar we sebitleýin meseleler ara alynyp maslahatlaşyldy. 

Sabah gazedi: "Ministr Çawuşogly: BMG-nyň Howpsyzlyk geňeşi täze görnüş koronawirus meselesini maslahatlaşmakda örän giýç galdy" söz başyly habarynda, Türkiýäniň Daşary işler ministri Mewlüt Çawuşoglynyň BMG-nyň Howpsyzlyk geňeşiniň täze görnüş koronawirus meselesini maslahatlaşmakda örän giýç galandygyny aýdandygyny okyjy köpçüliginiň dykgatyna ýetirýär. Ministr Çawuşogly, düýn merkezi ofisi Waşingtonda ýerleşýän Atlantik Konsil guramasynyň we Türk miras gaznasynyň bilelikde wideoşekilli göni aragatnaşyk arkaly geçiren maslahatyň "Ertiri kesgitlemek üçin şu gün näme edilmeli?" atly bölüminde, Türkiýäniň hemişe BMG-nyň Howpsyzlyk geňeşinde reforma geçirilmeginiň tarapdary bolandygyny beýan etdi. 

Watan gazedi: "NATO aýan etdi: Ilkinji gezek Türkiýeden ulanyldy" söz başyly habarynda, NATO-nyň Baş sekretary Ýens Stoltenbergiň koronawirusa garşy göreşde Türkiýäniň üstünde durup geçip: "NATO koll-sentri ilkinji gezek Türkiýeden Britaniýa kömek ugradylmagyny ýeňilleşdirmek üçin ulanyldy" diýendigini mälim edýär. 

Hürriýet gazedi: "THÝ ähli daşary ýurt uçar saparlaryny goý bolsun etdi" söz başyly habarynda, Türk howaýollary kärhanasynyň, täze görnüş koronawirus epidemiýasy sebäpli, resmiler tarapyndan alynan kararlaryň we görülen çäreleriň çäginde ähli daşary ýurt uçar saparlarynyň 2020-nji ýylyň 20-nji maýyna çenli bes edilendigini nygtaýar.

Star gazedi: "Kakadylan injir eksporty artýar" söz başyly habarynda, Türkiýäniň önümçiliginde we eksportynda dünýäde lider ýagdaýda bolan ugurlaryň biri bolan kakadylan injiriň eksporty boýunça şu möwsümde 180 million dollar girdeji alandygyny habar berýär. Egeý Eksportçylar birlikleriniň berýän habaryna görä, eksport möwsüminiň başlan güni bolan 26-njy sentýabrdan 4-nji aprele çenli geçen aralykda daşary ýurtlara 50 müň 822 tonna kakadylan injir satyldy we ondan 179 million 954 müň dollar girdeji alyndy.