Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Ýeni Şafak” gazeti “Yragy böldürmeris” söz başyly habarynda, Prezident R.T.Erdoganyň 25-nji sentýabrda garaşsyzlyk referendumyny geçirip, sebitde uruş turuzmak isleýän Yragyň Kürt Awtonomiýasynyň lideri Mesud Barzanä berk duýduryş berendigini ýazýar. Gazet Erdonyň: “Siz Yragyň bölünmegi üçin işe girişen halatyňyzda “Baş üssüne, dowam ediň” diýmeris. Muny olaryň özlerine näçe gezek aýtdyk” diýen sözlerini okyjy köpçüliginiň dykgatyna ýetirýär. Habarda BMG-niň Sessiýasyna gatnaşmak üçin Nýu-Ýorka giden Erdoganyň Demirgazyk Yrak baradaky kararyň 22-nji sentýabrda geçiriljek Milli howpsyzlyk geňeşiniň maslahatynda kabul ediljekdigini aýdandygy nygtalýar.
“Star” gazeti “Referendum kejirligi Habury ýapyp biler” söz başyly habarynda, Kürt Awtonomiýasynyň ähli duýduryşlara garamazdan “Garaşsyzlyk referendumyny” geçirmekde erjelligini dowam etdiren halatynda Erbilde adaty durmuşyň dowam etmegine uly goşant goşýan Habur serhet geçelgesiniň ýapylyp bilinjekdigine ünsleri çekýär. Gazet Türkiýäniň bir tarapdan harby operasiýa alternatiwini seljerýän bolsa, beýleki tarapdan resmi Erbiliň “ykdysady” taýdan mümkinçilik alýan ýeke-täk geçelge bolan Habur serhet geçelgesi bilen bagly alternatiwleri seljerýändigini ýazýar. Habarda türkmenlere täze söwda ýoluny açjak türkmen şäheri Talafaryň Zamar obasyndan gümrük geçelgesiniň açylmagynyň gün tertibine gelendigi mälim edilýär.
“Sabah” gazeti “2018-nji ýylda ösüş dowam eder” söz başyly habarynda, Wise-premýer Mehmet Şimşegiň Türkiýäniň 5 göterimden ýokarda bolan durnukly ykdysady ösüşini dowam etdirjekdigini aýdandygyny okyjy köpçüliginiň dykgatyna ýetirýär. Türkiýäniň Eksportçylar mejlisiniň guramagynda İlçileriň Gaziantep şäherindäki duşuşyga gatnaşan Şimşegiň: “2018-nji ýyl ykdysady ösüşiň dowam etjek ýyly bolar. ABŞ-nyň we Ýewropanyň Merkezi banklarynyň hem serişde taýdan ösüşe dowam etjekdigini görýäris” diýen sözlerini çap edýär.
“Haber Türk” gazeti “Aryçylyk maslahatynda Türkiýede geçiriler” söz başyly habarynda, Bütindünýä Aryçylar bileleşigi tarapyndan 1897-nji ýyldan bäri geçirilýän Apimondia halkara aryçylyk maslahatynyň 120-nji ýylynda ilkinji gezek Türkiýede geçiriljekdigini ýazýar. Habarda 29-nji sentýabr bilen 4-nji oktýabryň aralygynda Stambulyň Kongresler merkezinde geçiriljek çärä 105 ýurtdan 15 müň adamyň gatnaşmagyna garaşylýandygy nygtalýar.
“Hürriýet” gazeti “Rimdäkiden uly” söz başyly habarynda, Hataý welaýatynyň Antakýa etrabynda Rim döwründen galan gippadromyň we ybadathananyň tapylandygyny, binanyň Rimdäki Sirkis Maksimusdan has uly bolandygynyň çaklanylýandygyny aýan edýär. Uzynlygy 500, giňligi 75 metr bolan gippadromyň biziň eýýamymyzdan ozalky 1-nji asyrda gurulandygy we 80 müň adamlyk bolandygy çaklanylýar.
