Türk metbugatynyň gysgaça mazmuny

“Hürriýet” gazeti “Musulman dünýäsine jebislik çagyryşy” söz başyly habarynda, Prezident R.R.Erdoganyň musulman ýurtlarynyň jebis, agzybir bolmalydygyny nygtap: “Mýanmada musulman doganlarymyzyň çekýän zulumynyň, gynamalarynyň we sürgünleriniň bes edilmegi üçin bilelikde tagalla edeliň” diýen sözlerini çap edýär. Gazet düýn Gazagystanyň paýtagty Astana şäherinde geçirilen Yslam Hyzmatdaşlyk Guramasynyň 1-nji Bilim we tehnologiýa maslahatynda Türkiýä Prezident R.T.Erdoganyň wekilçilik edendigini ýazýar.

“Star” gazeti “Ýyldyrym: 10 ýylda 300 milliard dollarlyk maýa goýarys” söz başyly habarynda, Premýer ministr Binali Ýyldyrymyň Eskişehir welaýatynda işewür dünýäsiniň we jemgyýetçilik guramalarynyň wekilleriniň maslahatyna gatnaşandygyny okyjy köpçüliginiň dykgatyna ýetirýär. Habarda geljekki 10 ýylda diňe bir transport infrastrukturasyna goýuljak maýa goýumyň 100 milliard dollara barabardygyny nygtan Ýyldyrymyň, saglygy goraýyş tehnologiýalaryna, maglumatlar, aragatnaşyk we wirtual hakykat pudaklaryna hem 100 milliard dollarlyk maýa goýumyň goýuljakdygyna ünsi çeken Premýer ministr Ýyldyrymyň; “300 milliard dollarlyk maýa goýum barada aýdýaryn. Uzak däl, 10 ýyl barada aýdýaryn. Bulary meýilleşdirýärkä boş duramyzok. Ýurdumyzy global maýadarlar üçin çekiş merkezine öwürmek üçin elimizden geleni edýäris” diýen sözlerine üns çekilýär.

“Sabah” gazeti “Diňe Türkiýe kömege ylgady” söz başyly habarynda, bütin dünýä arakanly musulmanlaryň pajygasyny görmediksirän bolsa, Türkiýäniň uly wekiliýet bilen Bangladeşdäki bosgun düşelgelerine baryp, musulmanlaryň ham-gussasyny bölüşendigini, 2012-nji ýyldan bäri Arakan musulmanlarynyň pajygasy bilen ýakyndan gyzyklanýan we geçen anna güni sebitde müň tonna ynsanperwer kömegini paýlan TİKA-nyň başlygy Serdar Çamyň “BMG günsaýyn ýok bolýar. Arakanda diňe Türkiýe bardy” diýen sözlerini okyjy köpçüliginiň dykgatyna ýetirýär.

“Watan” gazeti “Çipras: Türkiýä gapylary ýapmak ýalňyş” söz başyly habarynda, Gresiýanyň Premýer ministri Aksis Çiprazyň Türkiýe bilen ÝB-niň arasyndaky agzalyk gepleşikleriniň bes edilmeginiň ýalňyş boljakdygyn aýdandygyny mälim edýär. çipras 82-nji Halkara Saloniki sergisinde geçirilen adaty metbugat ýygnagynda metbugat işgärleriniň soraglaryna jogap berendigini ýazýar. Habarda Türkiýe bilen ÝB-niň arasynda ýüze çykan dartgynlyk sebäpli Gresiýa gelýän bosgunlarynyň sanynyň 64 göterim artandygyny, Türkiýäniň esasy sebitleýin güýçlerden biri we sebitiň howpsyzlygy hem-de durnuklylygy taýdan möhüm faktordygyny beýan eden Çiprazyň, Germaniýanyň Federal Kansleriň Angela Merkeliň Türkiýe baradaky beýannamasynyň syýasy hasaplara esaslanýandygyny aýdandygy nygtalýar.

“Haber Türk” gazeti “Gurban baýramynda 30 million adam syýahat etdi” söz başyly habarynda, gurban baýramy mynasybetli 10 güne uzaldylan dynç alyşdan ýerlikli peýdalanmak islän 30 million raýatyň ýurduň içinde syýahat edendigi, baýramda awtomagistrallardan we köprülerden peýdalanan ulag sanynyň bolsa 15,5 milliona barabardygy mälim edilýär.