Türk metbugatynyň gysgaça mazmuny

Sabah gazeti “ABŞ-nyň PKK/PÝD-a goldaw berýändigi ýene-de bir gezek resmileşdirildi” söz başyly habarynda Anadoly habarlar gullugynyň ABŞ-nyň Siriýada aýralykçy terror guramasy PKK-nyň şahamçasy PÝD/ÝPG-niň basyp alan etrapçasynda iki hawa bazasynyň we 8 harby merkeziniň bardygy hakyndaky habarlary uly seslenme döredendigini ýazýar.

Anadoly habarlar gullugynyň “ABŞ Siriýada 10 ýerde PKK/PÝD-ä goldaw berýär” söz başyly habarynda PKK/PÝD tarapyndan basylyp alynan 320 kilometrlik meýdanda ABŞ-nyň harby merkezleriniň bardygy ýüze çykaryldy. PÝD Siriýanyň demirgazygynda Türkiýäniň serhetlerinde gündogarda Haseke, Rakka welaýatynyň demirgazygyny we Halabyň gündogaryndaky Munbiç bilen demirgazyk günbataryndaky Afrin we Tel Ryfat etraplaryny basyp aldy” diýilýär.

“Haber Türk” gazeti ýerli tank Altaýyň öndürilmegi üçin Otokar bilen birlikde BMJ we FNSS firmalaryna tendre gatnaşmaklary üçin çagyryş berlendigini ýazýar.

Üç ýerli firmanyň gatnaşmagyndaky tendr ilkinji etapda 250 tankyň öndürilmegini öz içine alýar.

Türkiýe jemi 1000 tank öndürmegi meýilleşdirýär.

Altaý Türkiýäniň ýerli mümkinçilikler bilen öndürjek esasy taslamalaryndan biri bolar.

“Watan” gazeti “Rus syýahatçylar rekorda tarap barýar” söz başyly habarynda 2016-njy ýylyň 1-nji ýanwary bilen 17-nji iýulyny öz içine alýan döwürde Antalýa 3 million 200 müň syýahatçynyň gelendigini, üstümizdäki ýylyň ady agzalýan döwründe bolsa howa ýoly arkaly gelen syýahatçylaryň sanynyň 4 million 372 müň adama ýetendigini habar berýär.

Ady agzalýan döwürde Antalýa gelen rus syýahatçylaryň sany bolsa 1 million 675 müňe ýetdi.

Şol san bilen Antalýa rus bazarynda 2015-nji ýyl bilen deňeşdirilende 21 göterim artdy.

“Star” gazeti “Türkiýäniň ösüş depgini kredit derejelendiriş guramalaryny ýene-de geň galdyrdy” söz başyly habarynda Türkiýäniň 2016-njy ýylyň 15-nji iýulyndaky agdarlyşyk synanşygyndan soň ykdysady taýdan çalt depginde ösmeginiň halkara kredit derejelendiriş guramalarynyň we banklaryň ünsüni özüne çekendigini aýan edýär.

Geçen ýyl 2,9 göterim ösüş eden Türkiýäniň ykdysadiýetiniň üstümizdäki ýyliň birinji çärýeginde bolsa 5 göterim ösmegi kredit derejelendiriş guramalarynyň ösüş çaklamaryny puja çykardy.

Halkara kredit derejelendiriş guramasy Moodysyň aprel aýynyň ortalarynda Türkiýäniň 2017-nji ýyldaky ösüş çaklamasyny artdyrmagyndan soň Amerikaly we Ýewropaly banklar bilen kredit derejelendiriş guramalary hem ösüş çaklamalaryny artdyrdy.