Türk metbugatynyň gysgaça mazmuny 12.01.2017

“Ýeni Şafak” gazeti “ABŞ terror guramasyny legallaşdyrmakdan ýüz öwürmeli” söz başyly habarynda Prezidentiň metbugat sekretary Ibrahim Kalynyň ABŞ-nyň terror guramalaryny legallaşdyrmakdan ýüz öwürmelidigi hakyndaky sözlerine ýer berýär.

Twitterden beýanat beren Kalyn ABŞ-nyň Merkezi güýçleriniň serkerdeliginiň Twitterden beren ýüzlenmesinde PÝD/ÝPG-niň aýralykçy terror guramasy PKK bilen arabaglanşygynyň ýokdygyny öňe sürmegine berk garşylyk görkezdi.

Kalyn ABŞ-nyň Merkezi güýçleriniň serkerdeliginiň şol ýüzlenmesiniň terror guramalaryny durdurmagyň ýerine olary legallaşdyrandygyny belledi.

“Haber Türk” gazeti “FETÖ, PKK-a we DAIŞ-e maglumat goldawyny berýär” söz başyly habarynda Ilçiler konferensiýasynda çykyş eden Içeri işler ministri Süleýman Soýlunyň Fetullahçy terror guramasy FETÖ-niň beýleki terror guramalary PKK bilen DAIŞ-e maglumat  we aksiýa goldawyny berýändigine aýratyn ünsi çekendigini ýazýar.

15-nji iýuldaky agdarlyşyk synanşygynyň öňüsyrasynda FETÖ tarapyndan PKK-a “Agdarlyşyga taýarlanýan esgere garşy hüjüm guramaň” diýlip görkezme berlendigini aýdan ministr Soýlu, munyň FETÖ bilen PKK-nyň arasyndaky hyzmatdaşlygyň subutnamasydygyny ýatlatdy.

Ministr Soýlu FETÖ-niň, PKK-niň we DAIŞ-iň halkara arabaglanşygy bolan guramalardygyny we Ýewropanyň FETÖ-ni ýakyndan tanamaýandygyny belledi.

“Star” gazeti “Bizi biri-birimize duşman edip bilmezler” söz başyly habarynda Prezident R. T. Erdoganyň aýaly Emine Erdoganyň Ilçileriň aýallary bilen günorta naharynda duşuşandygyny mälim edýär.

Emine Erdogan naharda sözlän sözünde terror guramalarynyň halky biri-birine duşman ýagdaýyna getirmegi maksat edinýändigini emma maksadyna ýetip bilmejekdigini nygtady.

Jebislik we bitewilik ýüzlenmesini beren Emine Erdogan “Türkiýe indi ozalky Türkiýe däl. Bizi etniki we dini ynançlary ýaly sebäplerden biri-birimize duşman edip bilmezler. Jebisligimizi güýçlendirmek üçin elimizden geleni ederis”diýdi.

 Emine Erdogan günbatarly ýurtlar FETÖ-niň 15-nji iýuldaky agdarlyşyk synanşygynda türk halkynyň demokratiýa göreşini görmediksireýändigini nygtady.

“Star” gazeti “BBC-niň habarçysy; Türkiýe, Londondan howpsyz” söz başyly habarynda merkezi Britaniýada ýerleşýän BBJ telewideniýesiniň tejribeli habarçysy we alyp baryjysy Mişel Buerk özüni Türkiýede Londondan howpsyz duýýandygy hakyndaky sözlerini okyjy köpçüliginiň dykgatyna ýetirýär.

Terrorçylykly hüjümleriň dünýäniň çar tarapynda guralýandygyny aýdan Mişel Buerk, 25 ýyldan bäri Türkiýede dynç alýandygyny we dost ýaryna Türkiýä gitmeklerini maslahat berýändigini ýatlatdy.

“Watan” gazeti THÝ-nyň ýolagçy sanynyň 2016-njy ýylda 2,5 göterim artandygyny habar berýär.

Gazet THÝ-nyň 2016-njy ýylda 62,8 million ýolagçy uçurandygyny belleýär.