Türk metbugatynyň gysgaça mazmuny 15.06.2015
Gün tertibiniň ileri tutulýan ugurlary baradaky habarlar gündelik gazetlerde giň seslenme döredýär
“Ýeni Şafak” gazeti: “Türk banklaryň daşary ýurt göçümi” söz başyly habarynda, Türkiýede sanlary 51-e ýeten we aktiw ululyklary 2,1 trillion lira barabar bolan bank pudagynyň daşary ýurtlarada hüjüme geçendigini mälim edýär. Gazet türk banklaryň daşary ýurtlarda açan şahamçalarynyň sany soňky 12 ýylda 98 göterim artyp, 81 ýetendigini belleýär. Gazet banklaryň daşary ýurtdaky şahamçalarynyň 5 milliondan gowurak adama hyzmat berýändigini, müşderilere beren kredit möçberiniň 10 milliard dollara ýetendigini ýazýar. Habarda pudagyň daşary ýurtlara açylmagynyň ýurduň maýa goýumlarynyň artmagyna we söwdanyň möçberiniň köpelmegine goşant goşýandygy nygtalýar.
“Star” gazeti: “Adamlaryň öýjüklerinden çip ýasaldy” söz başyly habarynda, Izmiriň Gediz uniwersitetinde geçirilen “Halkara Biosensor kongresinde” çykyş eden Profesor doktor Mehmet Dökmejiniň adamyň emeli organlary ýaly işleýän çipleri ýasandygyny okyjy köpçüliginiň dykgatyna ýetirýär. Habarda Dökmejiniň: “Çipleriň derman derňewlerinde adamlarda derňew geçirilýän ýaly netije alarys. Şeýlelik bilen derman derňewleri çaltlaşar we arzanlar. Kesellere garşy göreşde adamlar üstün çykar” diýendigi bellenýär.
“Sabah” gazeti: “Futbolda Ýewropanyň salgyt jennedi Türkiýe” söz başyly habarynda, Ýewropada futbolçylaryň döwlete töleýän salgyt mukdarlary göz öňüne tutulanda Türkiýäniň jennetdigini habar berýär. Gazet Türkiýäniň Super ligada oýnaýan futbolçylaryň alýan girdejileriniň döwlete töleýän 15 göterimlik salgydy bilen Litwa bilen birlikde Ýewropanyň iň az salgyt alýan 2-nji ýurdydygyny nygtaýar. Habarda Ýewropa ýurtlarynyň aglabasynda türgenler we aktýorlar ýaly ýokary girdeji alýan adamlardan köp möçberde salgydyň alynýandygy ýazylýar.
“Haber Türk” gazeti: “Ankarada ralli şüweleňi” söz başyly habarynda, Ýewropanyň iň uly ulag merkezi “Otonomide” 2-nji nusgawy ulag rallisi geçirildi. Gazet geçen hepdäniň ahyrynda geçirilen ralla 1938-1985-nji ýyllar aralygynda öndürilen 40-dan gowurak ulagyň gatnaşandygyna, ulaglaryň ralliniň ilkinji güninde 120 km, 2-nji güninde bolsa 140 km ýoly geçendigine ünsi çekýär. Habarda ralla ençeme nusgawy ulagyň gatnaşandygy bellenýär.
“Watan” gazeti: “Antalýa gum imperiýasy” söz başyly habarynda, Antalýada şu ýyl 9-njy gezek geçirilýän “Halkara Gum heýkel festiwalynyň” açylandygyny okyjy köpçüliginiň dykgatyna ýetirýär. Gazet festiwala 9 ýurtdan 22 heýkeltaraşyň gatnaşandygyny, heýkelleri ýasamak üçin 10 müň tonnadan gowurak derýa gumunyň ulanylandygyny ýazýar. Habarda “Dünýäniň 7 täsinligi we mifologiýa” mowzugy bilen geçirilýän festiwalda 200-e golaý heýkeliň sergilenýändigini nygtaýar.
