Türk metbugatynyň gysgaça mazmuny 02.06.2015

“Ýeni Şafak” gazeti: “Türkiýe tehnologiýa satýan ýurt” söz başyly habarynda, Türkiýäniň soňky ýyllarda tehnologiýa taýdan gazanan üstünlikleri bilen daşary ýurtly hünärmenleriň we ykdysadyýetçileriň içgin gyzyklanýandyklaryny mälim edýär. Gazet Estern Miçigan uniwersitetiniň mugallymy Prof.Dr Dewid Andersonyň: “Ozaldan daşary ýurtlardan getirilen tehnologiýany indi Türkiýäniň özi öndürýär. Türkiýe tehnologiýa pudagyna maýa goýdy, harytlaryny satyp biljek bir bazar döretdi” diýendigini ýazýar.

“Sabah” gazeti: “Türk uniwersitetleri dünýäniň iň gowy uniwersitetleri sanawyna girdi” söz başyly habarynda, bütün dünýädäki uniwersitetleriň iň gowy ugurlarynyň sanawynyň beýan edilendigini okyjy köpçüliginiň dykgatyna ýetirýär. Gazet Ýakyn Gündogar tehniki uniwersitetiniň Informatika instituty tarapyndan taýarlanan “Iň gowy 23 ugur” sanawynda türk uniwersitetleriniň 13 ugur boýunça ýer alandygyny habar berýär. Habarda ODTU-nyň sanawyň 9 ugry boýunça ýer alandygy, Bogaziçi uniwersitetiniň fizika ugry boýunça 165-nji oruna mynasyp bolandygy bellenýär. Gazet Stambul uniwersiteti, Stambul tehniki uniwersiteti, Ege, Uludag, Hajettepe, Ankara, Dokuz Eýlül, Gazi we Ýyldyz tehniki uniwersitetleri ýaly ençeme türk uniwersitetiniň tapawutly ugurlarda sanawa girendigini nygtaýar.

“Star” gazeti: “Kapadokýada bürgüt adam” söz başyly habarynda, dünýäniň ençeme ýurdunda wingsýuit böküşini ýerine ýetirýän braziliýaly sport türgeni we teleprodýuser Luigi Kaniniň bu gezek bolsa Türkiýäniň tanymal syýahatçylyk merkezi bolan Kapadokýadan bökendigini mälim edýär. Gazet her gün ýüzlerçe howa şarynyň uçýan sebitinde günüň doguşy bilen bilelikde howa şaryna münen Kaniýe wingsýuit uçarmany we howa operatory Džeýms Buleniň ýoldaşlyk edendigini we 1000 metr beýiklikden böken türgenleriň öz böküşlerini surata we wideo alandygyny ýazýar. Habarda Kaniniň: “Kapadokýa ýaly gözel tebigaty bolan bir ýerden bökmek isleýärdim” diýendigi bellenýär.

“Milliýet” gazeti: “Jekman Stambuly zabt etdi” söz başyly habarynda, geçen gezek ýarym galan konsertini doly tamamlamak üçin Stambula ýaňadandan gelen awstraliýaly aýdymçy Hýu Jekmanyň Stambuly syýahat edendigini okyjy köpçüliginiň dykgatyna ýetirýär. Gazet şapkasy we äýnegi bilen muşdaklaryna bildirtmän Aýasofýa we Topkapy köşgüne baran Jekmanyň ol ýerlerde düşen suratlaryny jemgyýetçilik saýtlarynda paýlaşandygyny ýazýar.

“Haber Türk” gazeti: “Zenan woleýbolçylar ýene-de Ankarany saýlady” söz başyly habarynda, Olimpiýa oýunlarynda bäsleşjek toparlaryň Ýewropa saýlaw ýaryşlarynyň Ankarada geçiriljekdigini habar berýär. Gazet woleýbol boýunça zenanlaryň arasyndaky 2016-njy ýylda geçiriljek Rio Olimpiýa oýunlaryna gatnaşjak toparlarynyň Ýewropa saýlaw ýaryşlarynyň 2016-njy ýylyň ýanwar aýynyň 4-9-y aralygynda Ankarada geçiriljekdigini nygtaýar.