Türk metbugatynyň gysgaça mazmuny 28.09.2014
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Ýeni Şafak” gazeti “Sebitde görelde alynyp bilinjek ýeke-täk nusga Türkiýe” söz başyly habarynda, Wise-premýer Ýalçyn Akdoganyň “Sebitdäki içerki çaknyşyklaryň, messep söweşleriniň, etniki we ideologik çaknyşyklaryň, jemgyýetçilik toparlarynyň arasynda dowam edýän bölünşikler we sosial trawmalar boýunça görelde alynyp bilinjek ýeke-täk nusga Türkiýe. Türkiýäniň çözgüt etaby arkaly sebite hödürlän çözgüdidir” diýen sözlerini çap eýär. Gazet Ýalçyn Akdoganyň bu sözleri Türk Senagatçylar we işewür adamlary jemgyýeti tarapyndan Mardin welaýatynda guran maslahatynyň açylyşynda eden çykyşynda aýdandygyny ýazýar.
“Milliýet” gazeti “Hytaýdan Türkiýä “erkin söwda teklibi” söz başyly habarynda, BMG-nyň 69-njy sessiýasynyň çäginde Nýu-Ýorkda saparda bolýan daşary işler ministri Mewlüt Çawuşoglynyň hytaýly kärdeşi Wang Ýi bilen duşuşandygyny mälim edýär. Habarda özara we sebitleýin meseleler barada pikir alyşylan duşuşykda Hytaýyň Çawuşoglynyň ýolbaşçylyk etmegindeki wekiliýete erkin söwda şertnamasynyň baglaşylmagynyň peýdaly boljakdygy barasyndaky pikirini beýan edendigi okyjy köpçüliginiň dykgatyna ýetirilýär.
“Akşam” gazeti “Ministr Çelik: “biz 6-njy ýerde” söz başyly habarynda, medeniýet we syýahatçylyk ministri Ömer Çeligiň syýahatçylyk pudagynyň iňňän hüşgär hereket edýändigini nygtap “Sebitimizde şeýle durnuksyzlyk bar hem bolsa Türkiýe şu ýyl syýahatçylykda rekord goýmaga dowam edýär. 2014-nji ýylyň awgust aýynda gelen syýahatçylaryň sany geçen ýylyň şol döwri bilen deňeşdirilende 7 göterimden gowrak artdy” diýen sözlerine üns çekilýär. Gazet ministr Çeligiň Türkiýäniň iň köp sapar edilýän ýurtlaryň hatarynda dünýä boýunça 6-njy ýerde, Ýewropa boýunça dördünji ýerde durýandygyny ýatladyp, “Gysga möheletde ilkinji maksadymyz dünýäde bäşinji ýeri eýelemek” diýen sözlerini çap edýär.
“Sabah” gazeti “ýerli i20 Parižde görkeziler” söz başyşyly habarynda, “Hýundainiň” İzmit şäherindäki zawodynda öndürilip, bütin Ýewropada satuwa çykaryljak täze i20 modeliniň sergide 3 we 5 gapyly görnüşleri bilen tanyşdyryljakdygyny ýazýar.
