Türk metbugatynyn gysgaça mazmuny 18.09.2014

“Hürriýet” gazeti “Howpsyzlyk maslahatynda YDYD guramasy barada möhüm kararlar kabul edildi” söz başyly habarynda, Çankaýa köşkünde Prezident R.T.Erdoganyň ýolbaşçylyk etmeginde geçirilen Howpsyzlyk maslahatynyň üç sagat dowam edendigini ýazýar. Habarda ABŞ tarapyndan teklip edilen koalisiýada Türkiýäniň nähili pozisiýa eýelejekdigi barasynda pikir alyşylandygy we hyzmatdaşlar bilen bilelikde işleşmek barasynda netijä gelinendigi mälim edilýär. Gazet şol kararlardan biriniň Türkiýäniň sebitdäki ähli terror guramalaryna garşy göreş boýunça ähli hyzmatdaşlar bilen alyp barýan syýasatynyň dowam etmegi barasyndadygyny okyjy köpçüliginiň dykgatyna ýetirýär.
“Akşam” gazeti “İspaniýa Türkiýä “patriot” roketasyny ugradar” söz başyly habarynda, İspaniýanyň goranmak ministri Pedro Morenesiň NATO-nyň iş meýilnamasyna laýyklykda Gollandiýanyň ýerine Türkiýä “patriot” roketa batareýasyny we hünärmen esgerlerini ugratjakdygyny aýdandygyny ýazýar. Habarda NATO-nyň Gallerde geçirilen maslahatynda NATO-nyň Türkiýede alyp barýan işleriniň hem seljerilendigini nygtan ministr Morenesiň, şol çäkde İspaniýanyň 6 sany “patriot” roketa batareýasy bilen 130 esgerini Türkiýä ugratjadkygyny aýdandygy mälim edilýär.
“Sabah”gazeti “Çilim gadagançylygynyň wagty belli boldy” söz başyly habarynda, saglygy saklaýyş ministri Mehmet Müezzinoglynyň çilim çekmekligiň açyk ýerlerde çäklendirilmegi baradaky düzgünnamanyň täze ýyldan başlap güýje girjekdigini aýdandygyny okyjylarynyň dykgatyna ýetirýär. Gazet ministr Müezzinoglynyň “Seýilgähleriň belli ýerlerinde, hassahana, ybadathana ýaly ýerleriň howlularynda çilim çekilýän ýerleriň gurulmagy, halka açyk bolan naharhana, kafe ýaly ýerlerde-de çilim çekilýän we çekilmeýän bölümleriň açylmagy üçin taýarlyklar görülýär” diýen sözlerini çap edýär.
“Star” gazeti “5-nji Stambul maliýe maslahaty öz işini tamamlady” söz başyly habarynda, maslahatyň ahyrynda çykyş eden maliýe ministri Mehmet Şimşegiň “infilliasiýanyň iň ýokary çäge ýetendigini pikir edýäris. Mundan beýläk berk çäreler bilen ýaňadandan 5-7 göterim aralygyna, soň bolsa orta we uzak möhletde 5 göterimden aşak düşürmegi tama edýäris” diýendigine ünsleri çekýär. Gazet 2015-2019-njy ýyllaryň arasyndaky döwürde saýlawyň ýokdugyny ýatladan Şimşegiň “Şol döwürde düýpli özgertmeleri durmuşa geçireris. Türkiýe şol döwürde 2002-2007-nji ýyllaryň aralygynda bolşy ýaly 6-7 göterim ösüş edip, öňde goýlan maksada ýeter” diýen sözlerini okyjy köpçüliginiň dykgatyna ýetirýär.
“Radikal” gazetiniň internet saýtynda “Şu käri saýlanlar işsiz galmaz” söz başyly habarynda, Türkiýede raýat awiasiýasynyň soňky ýyllarda çalt depginde ösýändigini, 2013-nji ýylda awiasiýa pudagynda ýolagçy sanynyň 150 milliona, howa menzilleriniň sanynyň bolsa 52-ä ýetendigini mälim edýär. Gazet şeýlelikde bu pudakda işlemegi saýlap alanlaryň işsiz galmajakdygyna ünsleri çekýär.