Türkiýäniň Ýewraziýa Ýurtlaryna Berýän Kömekleri

Hepdelik tapgyrlaýyn gepleşigimiziň nobatdaky sanynda Türkiýäniň koronawirusa garşy göreşde Ýewraziýa ýurtlaryna berýän kömegi hakynda durup geçmek isleýäris.

Ýewraziýa sebitinde ýerleşýän ýurtlarda koronawirus epidemiýasynyň ýaramaz täsirleri henizem dowam edýär. Sebit ýurtlarynda koronawirusa ýoluganlaryň sanynyň artýandygy üçin pandemiýa howply bolmagynda galýar. Sebitdäki käbir kiçi ýurtlarda hasaba alynanlaryň sany ilat sanyna görä ýokary. Şol sebäpli Ýewraziýa sebitindäki ýurtlaryň esasy bölegi epidemiýa garşy göreşde daşardan kömek almaga dowam edýär.

Türkiýe Respublikasy geçen iýul aýynda Azerbaýjana, Gazagystana, Gyrgyzstana we Özbegistana koronawirusa garşy alynyp barylýan göreşiň çäginde ikinji gezek lukmançylyk kömegini berdi. Şol kömegiň düzüminde maskalardan kesgitleýiş enjamyna, dem alyş enjamyndan dermanlara, dürli görnüşli enjamlar bar. Türkiýäniň Ýewraziýa sebitindäki ýurtlarda ýerleşýän diplomatik wekilhanalary, türk firmalary epidemiýanyň başlan gününden bäri kömeklerini dowam etdirýär.

Türkiýe Respublikasy Ýewraziýa sebitindäki degişli ýurtlaryň epidemiýa döwründäki lukman ýetmezçiligini gidirmek üçin Türkiýede işleýän ýa-da lukmançylykda hünärmenlik tälimini alýan lukmanlary belli bir möhlet bilen ýurtlaryna gidip, hassa bejermeklerine rugsat berdi. Aýratynam isleg bildiren tarapyň talabyna laýyklykda lukmanlardan ybarat bolan toparlar tejribe alyşmak üçin degişli ýurtlara gitdiler. Mysal üçin geçen iýul aýynda Özbegistanyň islegine laýyklykda türk lukmanlaryndan ybarat bolan topar ýurtda tejribe alyşdylar.

Türkiýäniň degişli guramalary koronawirusa garşy göreşde sebit ýurtlarynyň resmileri bilen geňeşmeleri we gepleşikleri üznüksiz dowam etdirýär. Türkiýe şol başlangyçlary bilen epidemiýa garşy göreşde Ýewraziýa ýurtlarynyň ýanynda durýandygyny görkezýär.

Türkiýe Respublikasynyň epidemiýa garşy göreşde üstünlikli bolmagy Ýewraziýa ýurtlarynyň ünsüni çekýär. Türkiýäniň Saglygy goraýyş ministrligi güýz aýlarynda Türk Geňeşine agza ýurtlardan wekiliýetleri Türkiýede kabul edip, tejribe alyşmaga başlar. Aslyna seredilende gurama agza döwletleriň lukmanlarynyň arasynda onlaýn tejribe alyşygy birnäçe aý ozal başlapdy. Türkiýäniň saglygy goraýyş pudagyna goýan maýa goýumlary, ýurduň epidemiýa garşy göreşde üstünlikli bolmagy Türkiýäni ýakyn gelejekde dünýäniň saglyk syýahatçylygy merkezlerinden birine öwürer.

Koronawirus epidemiýasynyň başyndan häzirki wagta çenli Türkiýe 130-a golaý ýurda kömek ugratdy. Türkiýäniň ýakyn sebitine, dost we doganlyk ýurtlara berýän kömegini bolsa berilen mysallarda görülşi ýaly üznüksiz dowam edýär. Türkiýe ýakyn sebit bilen ýygy hyzmatdaşlyk edip, kynçylyklary bilelikde ýeňip geçjekdigine we bilelikde galkynjakdyklaryny dost we dogan hyzmatdaşlaryna görkezmek isleýär.

Türkiýäniň gadamyny iler tutýan, proaktiw daşary syýasatynyň durnukly we peýdalaryny ýüze çykaran pandemiýa tapgyrynda özüni ähli taraplaýyn subut etdi. Resmi Ankaranyň şol syýasaty Ýewraziýa sebitinde ýerleşýän ýurtlardaky ýönekeý raýatlar üçin peýdaly bolýar. Dünýäniň ykdysady taýdan güýçli 10 ýurdunyň hataryna goşulmagy maksat edinýän Türkiýe, Türk dünýäsi we ýakyn sebiti üçin nusgawy döwlet bolmagynda galar. Sebit ýurtlary öz aralarynda arkalaşygy dowam etdiren halatynda şeýle kynçylykly tapgyry aňsatlyk bilen ýeňerler.