Russiýanyň goşunynyň Ukrainadaky hüjümleri dowam edýär

Ukrainanyň Zaparožýe welaýatynyň Energodar şäheriniň häkimi Dmitriý Orlow, Zaparožýe atom elektrik bekediniň töweregindäki ýaşaýyş ýerlerini bombalaýandygyny we ilkinji kesgitlemelere görä 10 adamyň ýaralanandygyny habar berdi. 

Energodar şäheriniň häkimi Dmitriý Orlow Telegram hasabyndan beren beýanatynda: "Energodar şäheriniň 3-nji, 4-nji we 5-nji etraplaryna hüjümler guralýar. Ilkinji kesgitlemelere görä 10 adam ýaralandy. Öýleriň aýnalary döwüldi. Ýolda duran ulaglar ýanýar" diýip mälim etdi. 

Dmitriý Orlow, ruslaryň ýurduň Energodar şäherindäki Zaparožýe atom elektrik bekediniň töwereginde guralýan hüjümleriň jogapkäriniň Ukrainadygyny öňe sürmek üçin Energodar şäheriniň ýaşaýjylaryndan gol ýygnamaga synanyşýandygyny belläp: "Rus basyp alyjylar Halkara Atom energiýa agentliginiň wekillerine dezinformasiýa hatyny ugratmak üçin taýarlyk gördüler we öňe sürmelere görä Ukrainanyň Ýaragly güýçleri tarapyndan atom elektrik bekedine garşy hüjümleriň bes edilmegini talap edýän bildirişiň çäginde Energodar şäheriniň ýaşaýjylaryndan gol ýygnaýarlar" diýip aýan etdi. 

Beýleki tarapdan Ukrainanyň Prezident ofisiniň metbugat sekretary Andreý Ýermak, Halkara Atom energiýa agentliginiň hünärmenleriniň, Zaparožýe atom elektrik bekedine tarap ýola çykandyklaryny mälim etdi. 

Ýermak atom elektrik bekediniň töweregindäki hüjümler bilen baglanşykly bolsa: "Ruslar Energodara od açýarlar. Dünýäni öjükdirip, şantaž etmäge synanyşýarlar" diýip habar berdi. 

Ukrainanyň Baş ştabyndan berilen beýanatda bolsa 24-nji fewral-29-njy awgust aralygynda Russiýanyň goşunynyň söweşdäki ýitgileri barada maglumat paýlaşyldy. 

Söweşde ýogalan rus esgerleriň sany 47 müň 100-e ýetdi, Russiýa degişli 234 uçar, 203 dikuçar, 1947 taňk, 4 müň 269 sowutly ulag, 1060 top ýok edildi. 

Russiýanyň goşuny şeýle hem 3 müň 188 ulagynda, 15 gämi we ýokary tizlikli katerinden, 844 uçarmansyz howa ulagyndan mahrum galdy. 

Russiýanyň Goranmak ministrliginden 25-nji martda berilen beýanatda, Ukrainada 1351 rus esgeriň ýogalandygy bellenipdi. 

Ukrainanyň Baş Ştabynyň başlygy Waleriý Zalužnyý Russiýa bilen 24-nji fewralda başlan söweşde takmynan 9 müň ukrain esgeriň ýogalandygyny habar beripdi.