Owganystanyň demirgazygyndaky ýene-de 4 etrap Talibanyň gözegçiligine geçdi

Owganystanyň demirgazygynda ýerleşýän Balh we Baglan welaýatlarynda ýene-de 4 etrap Talibanyň gözegçiligi astyna geçdi. 

Balhyň welaýat Şurasynyň wekili Saýed Abdullah Mesrur metbugata beren beýanatynda, Talibany başbozarlaryň Balh welaýatynyň Döwletabad, Şolgere we Kişindeh etraplaryna şol bir wagtyň özünde hüjüm gurandygyny habar berdi. 

Ady agzalan 3 etrabyň gözegçiliginiň Talibanyň eline geçendigini aýdan Mesrur, howpsuzlyk güýçleriniň etrabyň merkezinden yza çekilendigini mälim etdi. 

Baglan welaýat Şurasynyň wekili Firuzuddin Aýmak bolsa Baglan welaýatynyň Jilge etrabynyň Talibanly başbozarlar tarapyndan basylyp alynandygyny aýan etdi. 

Taliban tarapyndan berilen beýanatda hem 4 etrabyň özleri tarapyndan basylyp alynandygy tassyklandy. 

Beýanatda mundan başgada ýurdyň demirgazygyndaky Jüzjan welaýatynyň Hanaka we Faizabad etraplarynyň hem basylyp alynandygy öňe sürüldi. 

Düýn bolsa ýurdyň demirgazygyndaky Balh we Samangan welaýatlaryndaky 2 etrap Taliban tarapyndan basylyp alynypdy. 

Ýurtda bir tarapdan parahatçylyk tapgyrynyň näbelliligi dowam edýän bolsa, beýleki tarapdan hüjümler dowam edýär. 

Soňky 2 aýda ýurt derejesinde Talibanyň gözegçiligi astynda geçen etraplaryň sany 30-dan hem geçdi. 

BMG tarapyndan berilýän maglumata görä, Taliban ýurdyň territoriýasynyň 50-70 göterim aralygyny öz gözegçiliginde saklaýar. 

Owganystanyň territoriýasynyň aglaba ýerinde howpsuzlyk güýçleri bilen Talibanly başbozarlaryň arasynda göreş dowam edýär, ýurdyň 407 etrabynyň 250-sinde çaknyşyklar dowam edýär.