Pakistan Hindistanyň 2 harby uçaryny urup düşürdi
Hindistan bolsa Pakistana degişli 1 uçaryň urlup düşürilendigini habar berdi
Pakistanyň harby güýçleri howa giňişligine giren Hindistanyň 2 harby uçarynyň urlup düşürilendigini we Pakistanyň gözegçiligindäki ýere gaçan uçaryň uçarmanynyň ele salynandygyny beýan etdi
Pakistanyň harby güýçleriniň Metbugat Sekretary general maýor Asyf Gafur Twitter arkaly beren habarnamasynda Howa güýçleriniň howa giňişligine giren hindi harby uçarlarynyň öňüne böwet goýandygyny, 2 sanysyny urandygyny we şolardan biriniň Pakistanyň gözegçiligindäki ýere, beýlekisiniň bolsa Hindistanyň territoriýasyna gaçandygyny mälim etdi.
Gafur Pakistan tarapyna gaçan uçaryň uçarmanlaryndan biriniň Pakistanyň harby güýçleri tarapyndan ele salynandygyny habar berdi.
Daşary işler ministrliginiň Metbugat Sekretary Muhammed Faýsal bolsa resmi Twitter hasabyndan beren habarnamasynda Pakistanyň Harby howa güýçleriniň Kaşmiş gözegçilik zolagyna guran operasiýasynyň goranyş maksatlydygyny nygtap; “Biziň maksadymyz özümizi goramakdaky ygrarlygymyzy we ukybymyzy görkezmek. Dartgynlygyň möwjemegini islemeýäris, emma biz ähli şertlere taýar” diýdi.
Beýleki tarapdan mundan ozal Pakistanyň Harby howa güýçlerine degişli 3 uçaryň ir ertir Kaşmir Serhet gözegçilik zolagyny geçip, Hindistanyň gözegçiligindäki Jammu Kaşmire girendigini we Hindistana degişli uçarlaryň öňüni alyş operasiýasyny geçirendigini habar berilipdi.
Hindistanyň habar beriş serişdeleri bolsa harby goşunyň Pakistana degişli 1 sany harby uçaryny urup düşürendigini habar berdi.
Pakistan we Hindistan iki taraply häsýetde harby uçarlarynyň urlup düşürilmeginden soň köp sanly şäheriň howa menzillerini ýapyp, ýolagçy gatnawlaryny bes etdi.
