Eýranda 6,4 bal ululygynda ýer titremesi boldy

Eýranyň Kirmanşah welaýatynda 6,4 bal ululygyndaky ýer titremede 646 adam ýaralandy

Kirmanşahyň Lukmançylyk bilimleri uniwersitediniň rektory Muhammed Ryza Muradi, welaýatyň Serpol Zehab şäherinde 290 adam, Gilanigarb şäherinde 170 adam, Kasry Şirin şäherinde 109 adam, Günbatar Yslamabatda 54 adam we beýleki ýerlerde 23 bolmak bilen jemi 646 adamyň ýaralanandygyny habar berdi.

Muradi Eýranyň resmi agentligi IRNA beren beýanatynda, 44 tiz kömek ulagy bilen 1 awtobusyň ýer titreme bolan ýerinde adamlara kömek berýändigini habar berdi.

Ýer titreme sebäpli mekdeplere we uniwersitetlere arakesme berilen Kirmanşahda, elektrik toklarynyň kesilmändigi we gijäni daşarda geçiren raýatlara gerek bolen kömegiň berilendigi mälim edildi.

Tähran uniwersitediniň Geofizika institutynyň seýismologiýa merkezinden berilen beýanatda, güýç merkezi Kirmanşah welaýatynyň Serpol Zehab şäheriniň obalyk ýerinde ýeriň 7 km aşagynda, düýn agşam ýerli wagt bilen sagat 20:07-de 6,4 bal ululygynda ýer titremäniň bolandygy habar berildi.