S.Arabystanynyň Mirasdar Şazadasyň kömekçisi, Kaşykçydan birnäçe sagat ozal Konsullyga giripdir

Amerikanyň New York Times gazedi, Saud Arabystanynyň Mirasdar Şazadasy Muhammed Bin Selmana ýakyn adamlaryň biri bolan Maher Abdulaziz Mutrebiň 2-nji oktýabrda Jemal Kaşykçydan birnäçe sagat ozal Saud Arabystanynyň Stambuldaky Başkonsullyk binasyna girendigi baradaky suratlary paýlaşdy.

Habarda, Maher Abdulaziz Mutrebiň şol günüň soňraky sagatlarynda, Saud Arabystanynyň Stambuldaky Başkonsuly Muhammed El-Uteýbiniň öýüniň öňünde durandygy, myhmanhanalaryň birinden elinde uly bir çemodan bilen çykandygy we Stambuldaky Atatürk howa menzilinden Türkiýeden çykandygy baradaky suratlar paýlaşyldy.

Alynan suratlarda, irden Türkiýäniň wagty bilen sagat 09:55-de konsullyk binasyna giren Mutreb, 16:45-de başkonsulyň öýüniň öňünde görülýär. Mutreb sagat 17:15-de Stambulda galan myhmanhanasyndan çykandygy we 17:58-de howa menziline barandygy görülýär.

New York Times gazedi, Maher Abdulaziz Mutrebiň 2017-nji ýylda Saud Arabystanynyň Londondaky ilçihanasyna bellenen bir diplomatdygyny we Saud Arabystanynyň Mirasdar Şazadasynyň goragçysy hökmünde ençeme ýurda sapar gurandygyny habar berdi.

Washington Post gazedinde makala ýazan Jemal Kaşykçy, 2-nji oktýabrda sişenbe güni resmi işler üçin baran Saud Arabystanynyň Stambuldaky Başkonsullugyna gireninden soň dereksiz ýitipdi.