Pentagon Siriýanyň Manbij sebiti bilen bagly beýanat berdi

Adrian Rankin-Galloueý Anadoly habarlar agentliginiň işgärine beren beýanatynda Türkiýäniň we ABŞ-niň harby resmileriniň Manbij meýilnamasyny ara alyp maslahatlaşmak üçin 22-23-nji iýun aralygynda paýtagt Ankarada duşuşandygyny mälim etdi.

Ady agzalan duşuşykda resmileriň Manbij meýilnamasynyň 2-nji tapgyryna gönügendiklerini aýdan Adrian Rankin-Galloueý: “Geçen hepdäniň ahyrynda geçirilen duşuşyklar 4-nji iýunda ylalaşan Manbij meýilnamasynyň ýola goýulmagy üçin Türkiýäniň we ABŞ-niň Goranmak ministrlikleriniň resmileriniň arasynda dowam edýän dialogyň we Manbijiň golaýynda howpsyzlygy we durnuklylygy üpjün etmek bilen bagly beren sözümiziň bir bölegidi” diýdi.

Manbijde Türk-Amerikan umumy patrullygyň haçan başlajakdygy bilen bagly soraga Adrian Rankin-Galloueý: “Bu babatda gepleşikler dowam edýär” diýip jogap berdi.

Manbij meýilnamasy ekstremist terror guramasy ÝPG/PKK-a agza terrorçylaryň etrapdan çekilmegini, gurama bilen arabaglanşygy bolan adamlaryň bolsa ýerli mejlisden we geňeşlerden aýrylmagyny özünde jemleýär.

Iki ýurdyň arasynda baglaşylan ylalaşyga laýyklykda mundan başgada Türk-Amerikan güýçleri ilki bilen Manbijiň golaýynda garaşsyz we sazlaşykly patrullyk eder, soň bolsa etrabyň öz içinde patrullyk ederler.