Asadyň DAEŞ bilen edýän gatnaşyklary

DAEŞ hökümetiň elektrik toguny we tebigy gazyny kesip biljek mümkinçilige eýedigine garamazdan kesmeýär, Asada jan berýär.
Noýabr aýynyň ikinji ýarymynda Russiýanyň DAEŞ-iň gözegçiligindäki Deýrezzora guran bombaly hüjümlerinde käbir nebit we tebigy gaz desgalaryna zeper ýetipdi.
Hüjümlerde hökümetiň gözegçiligindäki ýerlere gaz akdyrýan turba geçirijiler ýarylypdy.
Deýrezzoryň merkezinde we daşynda ýerleşýän, hökümetiň gözegçiligindäki tebigy gazdan elektrin toguny öndürýän beketlerinde uly kynçylyklar ýüze çykypdy, Asada tabynlykdaky ýerlerde elektrik togy ýetmezçilik edýärdi.
Bütindünýä bankynyň görkezijilerine görä Siriýada elektrik önümçiliginiň ýarysyndan gowragy tebigy gazdan öndürilmegi turba geçirijileriniň birkemsiz ulanylmagyny talap edýär.
“Anadoly” habarlar gullugynyň howpsyzlyk çeşmelerinden alan maglumatyna görä Siriýanyň hökümeti bilen terror guramasy DAEŞ-iň şol kynçylyklary ýeňip geçmek üçin edýän hyzmatdaşlygy Siriýanyň goşunynyň aragatnaşygyny yzarlan türk howpsyzlyk gulluklary tarapyndan paş edildi.
Belliklere görä hökümet hepdäniň dowamynda Deýrezzor welaýatynda DAEŞ-iň hözegçiligindäki Meriýe etrabynda tebigy gaz geçirijisiniň abatlanmagy üçin topar ugratdy.
Ştab kwartiradan Meriýeniň golaýynda ýerleşýändigi belli bolan Serde, Jafra we howa menzilindäki harby bölümlere berilen bildirişde guramanyň gözegçiligindäki giňişlige barjak, tebigy gaz geçirijisini abatlajak topara od açymazlyk barada buýruk berildi.
Bildirişde DAEŞ-iň gözegçiligindäki ýere ugradylan toparyň hökümet işgärleri däldiginiň duýdurylmagy bolsa, toparyň daşary ýurtly tehnikler bolma ähtimallygyny hem ýada salýar.
DAEŞ-iň öz gözegçiliginde abatlanjak ýere hökümetiň toparyny kabul etmegi bolsa Asad bilen ozaldan ylalaşandyklaryny görkezýär.
Bildirişi beren ofiseriň “Tebigy gaz geçirijisini oňarjaklara od açsak bütin Siriýanyň togy kesiler” diýmegi, guramanyň elinde hökümete garşy ulanmadyk uly ýaragynyň bardygyny görkezýär.
Harby bölümlere berilen buýrukda DAEŞ göz öňünde tutulyp “Aramyzda elektrik üçin gerek bolan tebigy gaz turba geçirijisiniň oňarylmagy barada ylalaşyk bar” diýilýär.
Siriýanyň hökümeti bilen DAEŞ-iň arasyndaky nebit söwdasy soňky hepdelerde halkara jemgyýetçiliginde-de gün tertibine gelipdi.
Siriýada içerki uruş sebäpli nebit önümçiliginiň pese gaçmagy we halkara çäklendirmeler sebäpli hökümetiň nebit üçin DAEŞ-e gönügendigi bilinýär.
DAEŞ-iň gözegçilik edýän giňişliklerinden hökümetiň gözegiligindäki ýerlere tankerler we turba geçirijiler bilen nebit akdyrylýar.
ABŞ-nyň gazna ministrligi hökümet bilen DAEŞ-iň arasynda nebit söwdasyny edýän käbir adamlaryň atlaryny geçen ahyrynda gara sanawa goşupdy.
Amerikan hökümeti we käbir Ýewropa ýurtlary hepdäniň dowamynda Asad bilen guramanyň arasyndaky nebit söwdasyna ünsi çekipdi.