شنول گونش: "بیر گوناهکار وارسا، او منم"

"ایلک دقیقه‌لردن رقیبین پرسینقی ایله اوزلشدیک. اوزون اؤتورمه‌لرله ساوونما خطیمیزه چتین آنلار یاشاتدی‌لار".

بو سؤزلر تورکیه میللی‌سی‌نین مربیسی شنول گونشه مخصوص‌دور.

یورو-2020-نین قروپ مرحله‌سی‌نین ایکینجی توروندا ولز ایله باکی الیمپیک ایستادیونوندا اوز-اوزه گلن "آی-اولدوزلولار" 0:2 حسابی ایله مغلوب اولا‌راق، ایلک ایکی یئر شانسینی ایتیریب‌لر.

قارشیلاشما‌دان سونرا تشکیل اولونان مطبوعات کنفرانسیندا 69 یاش‌لی متخصص بون‌لاری دئییب: "بوراخیلان گل‌ا باخمایا‌راق، تیم توپارلاندی، هوجوم اویونو سرگیله‌دی. بیر نئچه گل ایمکانیمیز دا اولدو. تأسف کی، سون دقیقه‌ده ایکینجی توپو بوراخدیق. رقیب بو گون داها سویوققان‌لی اوینادی. بو گون 2:0 حساب‌لی غلبه ده قازانا بیلردیک. آنجاق ایندیکی دورومدا قروپ‌دان چیخماق شانسیمیز خیلی آزالدی. ایتالیا ایله موسابیقه ده‌کی اویونون شوکونو گؤرونور اوزریمیزدن آتا بیلمه‌میشیک. بو تورنیر بیزیم اوچون اؤنملی ایدی. داها یاخشی اویونلا امتیازلار قازانما‌لی ایدیک".

گونش اوغورسوز چیخیشا گؤره اؤزونو گوناهلاندیریب: "بو مغلوبیتین مسئولیتی منیم‌دیر. یعنی بیر گوناهکار وارسا، او منم. فوتبولچولار اونلارا وئریلن تاپشیریغی یئرینه یئتیردی‌لر. دوزدور، بعضی اویونچولار، خصوصاً ده، اورتا ساحه‌ده چیخیش ائدن‌لر یارادیجی‌لیق باخیمیندان ایستدیگیمیزی اورتایا قویا بیلمه‌دی. من هئیتی سئچنده حاضیرلیق دوروم‌لارینا باخیرام".