ایکی تورک تیمی دؤردلو فینالدا
تاریخ‌ده ایلک دفعه ۲ تورک تیمی دؤردلو فینالدا بیر بیرینه رقیب اولاجاق
تورک هاوا یوللاری آوروپا لیگینده دؤردلو فینال تیملری بللی اولدو.
تورک هاوا یوللاری آوروپا لیگی پلی آف دؤردده‌بیر فینال سریسی بئشینجی و سون اویونون‌دا آنادولو ائفئس، قوناق ائتدیگی ایسپانیا تمثیل‌چی‌سی بارسلونا لاسسانی ۸۰-۷۱ اوددو و سریده دورومو ۳-۲یه گتیره‌رک دؤردلو فینالا آدینی یازدیردی.
آوروپا بسکتبالینین کلوبلار سویه‌سین‌ده ان پرستیژلی تشکیلاتین‌دا نورمال مؤوسومو ۴.جو بیتیره‌ن آنادولو ائفئس، پلی آف دؤردده‌بیر فینال سریسین‌ده ۵.جی بارسلونا لاسسا ایله ائشلشدی.
سرینین ایستانبول‌داکی ایلک اویونونو ۷۵-۶۸ قازانان تورک تیمی، ایکینجی اویون‌دا ۷۴-۷۲ مغلوب اولاراق ائو صاحبی اوستونلویونو ایتیردی.
ایسپانیادا داوام ائدن سرینین اوچونجو اویونون‌دا رقیبینی ۱۰۲-۶۸لیک حساب ایله مغلوب ائدن آنادولو ائفئس، دؤردونجو یاریشمانی ۸۲-۷۲ اودوزونجا نتیجه بئشینجی و سون اویونا قالدی.
آنادولو ائفئس سینان اردم ایدمان سالونون‌دا ۱۵ مین ۶۳۲ طرفدار اؤنون‌ده اوینانان یاریشما‌دا رقیبینی ۸۰-۷۱ مغلوب ائتدی و دؤردلو فینالا یوکسلدی.
۱۸ ایل آرادان سونرا آوروپا لیگینده دؤردلو فینالا قالان آنادولو ائفئسین رقیبی بیر باشقا تورک تیمی فنرباخچا بئکو اولدو.
بئله‌لیکله، تاریخ‌ده ایلک دفعه ۲ تورک تیمی دؤردلو فینالدا ایشتیراک ائد‌جک و بیر بیرینه رقیب اولاجاق.
تورک هاوا یوللاری آوروپا لیگینده دؤردلو فینال، ۱۷-۱۹ می تاریخلرین‌ده ایسپانیانین بیتوریا شهرین‌ده گئچیریله‌جک.
دؤردلو فینالدا روسیانین جسکا موسکوا تیمی ایله ایسپانیا تمثیل‌چی‌سی رئال مادرید قارشی قارشییا گله‌جک.
