اردوغان، سئچیم سونوجلارینی یوروملادی
"نتیجه‌لردن باغیمسیز اولاراق بو سئچیمین غالیبی اؤنجه دموکراسیمیزدیر، میللی ایراده‌دیر، هانسی سیاسی گؤروشه منسوب اولسا اولسون ۸۵ میلیونون هامیسیدیر"
جمهورباشقانی رجب طیب اردوغان، دۆنن تشکیل ائدیله‌ن یئرلی سئچیم نتیجه‌لری ایله باغلی اولاراق،
"بو سئچیمین غالیبی دموکراسیمیزدیر، میللی ایراده‌دیر" دئدی.
جمهورباشقانی اردوغان، سئچیم نتیجه‌لرینین بللی اولماسینین آردیندان، باشقانی اولدوغو عدالت و قالخینما پارتیسی باش مرکزی بالکونوندان وطنداشلارا خطاب ائتدی.
"وطنداشلاریمیزین ساغ‌دویو، گوونلیک گوجلریمیزین فداکارلیقلاری سایه‌سینده تۆرک دموکراسیسی رۆشدونو بیر دفعه داها اثبات ائتمیش اولدو" دئیه دانیشان اردوغان،
"سئچیملر، بیلدیگینیز کیمی، دموکراسیلرین ان حساس گونلریدیر. میللتین ایراده‌سی صاندیقدا تجلی ائدر. میللت، سؤزونو صاندیق یولویلا سؤیلر. میللت، سیاستچییه مئساژینی صاندیق واسطه‌سی ایله چاتدیرار. میللت، اویاریسینی و تقدیرینی صاندیق واسطه‌سی ایله ایفاده ائدر. /.../. ۳۱ مارس محلی ایداره‌لر سئچیملرینده ده تۆرک میللتی، یئنه صاندیغی وسیله ائد‌رک مئساژلارینی سیاستچیلره چاتدیرمیشدیر. نتیجه‌لردن باغیمسیز اولاراق بو سئچیمین غالیبی اؤنجه دموکراسیمیزدیر، میللی ایراده‌دیر، هانسی سیاسی گؤروشه منسوب اولسا اولسون ۸۵ میلیونون هامیسیدیر" ایفاده‌لرینی ایشلتدی.
"هله دقیقلشمه‌میش اولماقلا بیرلیکده صاندیق نتیجه‌لری بیزه (عدالت و قالخینما پارتیسی)، اؤلکه‌میزده ارتفاع ایتکیسی یاشادیغیمیزی گؤستریر. البته یئرلی اولاراق یاشانان بو گئریله‌مه‌نین سببلرینی آیریجا ماسایا یاتیرداجاغیق. ایتیردیگیمیز، گئرییه دۆشدوگوموز هر یئرده، سببلری چوخ یاخشی معین ائد‌جک و لازیم اولان موداخیله‌لری ائده‌جییک" دئیه‌ن اردوغان، سئچیم نتیجه‌لرینین اؤلکه‌یه، میللته، شهرلره، محله‌لره و کندلره خیرلی اولماسینی دیله‌دی.
