هاکان فیدان: تورکیه‌ ایندی هر ساحه‌ده وار

خاریجی ایشلر ناظیری هاکان فیدان، غزه زولاغیندا تجیلی آتیش‌کسین یارادیلماسی‌ ایله باغلی بیرلشمیش میللت‌لر تشکیلاتینین تهلوکه‌سیزلیک شوراسینین قبول ائتدیگی قطعنامه لاییحه‌سی ا‌یله باغلی، "ایسرائیل اؤز غدّارلیغی‌ ایله باش-باشا قالیب." دئدی.

هاکان فیدان آدانادا ایفطار پروگرامینا قاتیلیب.

فیدان پروگرامداکی چیخیشیندا جمهورباشقانی رجب طیب اردوغانین گئجه-گوندوز میللت اوچون چالیشدیغینی، موباریزه آپاردیغینی ایفاده‌ ائده‌رک میللی دیرچلیش دؤورونه قدم قویولدوغونو، بونون دا تورکیه‌نین یوزایلی اولدوغونو دئییب. فیدان، "تورکیه‌ اولاراق ایندی هر ساحه‌ده، هر میز باشیندا واریق." دئدی.

فیدان ساوونما صنایعسینده یئرلیلیک و میللیلیک نیسبتینین یوزده 80-ه چاتدیریلدیغینی قید ائدیب، "گوجلو سیاسی ایراده‌، آرتان میللی ایمکان و قابیلیت ا‌یله بیرلشه‌رک، اؤلکه‌ده‌کی بوتون ترور تشکیلاتلارینین بئلینی قیردیق. آرخاسیندا کیمین اولماسیندان آسیلی اولمایاراق، سوریه و عراقدا ترور دهلیزینه اجازه‌ وئرمه‌دیک و وئرمیه‌جییک." دئدی.

هاکان فیدان دونیانین مرکب و چتین بیر پروسه‌دن کئچدیگینی وورغولاییب، "بو گون هر جور چتین شرطلره باخمایاراق، بیز بیر طرفدن اوکرایندا، غزه‌ده، جنوبی قافقازدا، عراقدا، لیبی و بالکانلاردا صلحون برقرار اولماسی اوچون چالیشیریق، دیگر طرفدن‌ده بقامیزی، سویداشلاریمیزی و دین قارداشلاریمیزی قورو‌ماق اوچون الیمیزدن گلنی ائدیریک." دئدی.

فیلیسطین دعواسینی دستکلدیکلرینی ایفاده‌ ائدن خاریجی ایشلر ناظیری، "گؤستردیگیمیز اولوسلارآراسی تضییقلر اؤز نتیجه‌سینی وئرمکده‌دیر. بیرلشمیش میللت‌لر تشکیلاتینین تهلوکه‌سیزلیک شوراسینین آتیش‌کس و تعجیلی اینسانی یاردیم چاغیریشی‌ ایله باغلی نتیجه‌ قراری دا بونون تظاهرو اولدو. بو دفعه‌ حتی آمریکا بئله‌ قرارین وئریلمه‌سینه مانع اولا بیلمدی. ایسرائیل اؤز غدّارلیغی‌ ایله باش-باشا قالدی. غزه‌ده‌کی وحشیلیکلره سون قویماق و فیلیسطین دؤولتینین آیاق اوسته دایاناجاغی عدالتلی صلحون برقرار اولماسی اوچون هر پلاتفورمادا فیلیسطینلیلرین سسی و نفسی اولماغا داوام ائده‌جییک." دئدی.