اردوغان اسرائیلی اویاردی

جمهورباشقانی رجب طیب اردوغان، اسرائیله، دؤولت کیمی دئییل هؤرگوت کیمی داورانیر‌سا سونون‌دا هؤرگوت کیمی قارشیلیق گؤره‌جگی اویاریسینی ائتدی.
جمهورباشقانی اردوغان، باشقانی اولدوغو عدالت و قالخینما پارتیسینین تورکیه بؤیوک میللت مجلیسینده‌کی قروپ توپلانتیسیندا دانیشدی.
دانیشماسیندا اورتا دوغودا آرتان گرگینلیگه گئنیش یئر آییران جمهورباشقانی، اسرائیل اوردوسونون محاصره آلتینداکی غزه‌یه قارشی سالدیریلارینا باغلی،
"غزه‌یه قارشی اورانتیسیز و هر جور اخلاقی تملدن محروم سالدیریلاری، دونیادا اسرائیلی هئچ گؤزله‌مه‌دیگی و ایسته‌نمه‌یه‌ن مؤقعیته آپارابیلر" دئیه‌رک، اسرائیل رهبرلیگینه،
"اسرائیل، دؤولت کیمی دئییل هؤرگوت کیمی داورانیر‌سا، سونوندا هؤرگوت کیمی قارشیلیق گؤرمه‌یه باشلایاجاغینی اونوتمامالیدیر" اویاریسینی ائتدی.
اینسانی کؤمکلرین کسیلمه‌سی کیمی فیلیسطین خالقینی بوتونلوکله جزالاندیرماغی آماجلایان تله‌سیک قرارلاردان هر کسین اوزاق دورماسی لازیم اولدوغونو بیلدیرن اردوغان، 
"بیر شهرین سویونو، الکتریکینی، گیریش چیخیشلارینی کسیب، آلت یاپیسینی چؤکدوره‌رک، مسجیدیندن کلیسه‌سینه، بوتون عبادتخانالارینی، اوخوللارینی ییخاراق، اینسانلارین ان ایلکین اینسانی احتیاجلارینا چاتماسینا مانع تؤره‌ده‌رک، ایچینده وطنداشلارین یاشادیغی بینالاری بومبالارلا یئرله بیر ائد‌رک، نهایت هر جور اوتانج وئریجی اصوللا ایجرا ائدیله‌ن بیر چاتیشما ساواش دئییل، قیرغیندیر" دئیه دانیشدی.
وطنداشلارا قارشی هئچ بیر حرکتی، سیویل یئرله‌شیملری هدف آلان هئچ بیر سالدیرینی دوغرو گؤرمه‌دیکلرینی، ساواشین دا بیر اخلاقی اولدوغونا، طرفلرین ده بونا رعایت ائتمه‌سی لازیم اولدوغونا ایناندیقلارینی بیلدیرن اردوغان،
"تأسف کی، اسرائیل و غزه‌ده‌کی چاتیشمالاردا بو ایلکه/اصل چوخ آغیر بیر شکیلده پوزولماقدادیر. اسرائیل تورپاقلارینداکی وطنداشلارین اؤلدورولمه‌سینه آچیقجا قارشی چیخیریق" دئیه دانیشدی.
"بؤلگه‌میزی ایچینه گیردیگی بو بورولقاندان سرعتله چیخارماق اوچون تورکیه اولاراق، آراچیلیق و 'عدالتلی حکملیک' داخیل اوزریمیزه نه دوشورسه ائتمه‌یه حاضیریق" دئیه‌ن جمهورباشقانی، 
"بؤلگه‌یه قالیجی دینجلیک آنجاق بیرلشمیش میللتلر قرارلارینا دایانان، ۱۹۶۷ سرحدلرینده، باشکندی دوغو قدس اولان موستقیل بیر فیلیسطین دؤولتی قورولماسییلا و (بو دؤولتین) بوتون دونیا طرفیندن تانینماسییلا گله‌بیلر" فیکیرینی ده تکرارلادی.
حماسین عسگری قانادی قسام توغایلاری، جمعه‌ائرته‌سی گونو اسرائیله "الاقصی توفانی" آدلی احاطه‌لی بیر سالدیری باشلاتدیغینی بیلدیرمیشدی. غزه‌دن اسرائیله مینلرجه راکت آتیلارکه‌ن سلاحلی قروپلار دا بؤلگه‌ده‌کی یئرله‌شیم یئرلرینه گیرمیشدی.
اسرائیل اوردوسو دا ساواش اوچاقلاری ایله غزه‌یه دمیر قیلینجلار عملیاتی باشلاتدیغینی آچیقلامیشدی. 
آرتان گرگینلیکده هر ایکی طرفدن یوزلرجه جان ایتکیسی وار.