اردوغان: آراچیلیغا حاضر اولدوغوموزو ایفاده ائتمک ایسته‌یره‌م

جمهورباشقانی رجب طیب اردوغان، اورتا دوغودا یاشانان گرگینلیگه باغلی،
"تورکییه اولاراق، طرفلرین طلب ائتمه‌سی حالیندا اسیر دییشیمی داخیل هر جور آراچیلیغا حاضر اولدوغوموزو ایفاده ائتمک ایسته‌یره‌م" دئدی.
جمهورباشقانی اردوغان، کابینه توپلانتیسیندان سونرا، ایچ و دیش گوند‌مه دایر دگرلندیرمه‌لر وئردی.
"۱۹۶۷ سرحدلری ایله، باشکندی قدس اولان، جغرافی بوتونلوگه صاحب، مستقیل، اگمن بیر فیلیسطین دؤولتی قورولمادان بؤلگه‌یه دینجلیک و باریش گلمز" اویاریسینی دیله گتیرن اردوغان، 
"بیز نه اسرائیل تورپاقلاریندا نه فیلیسطین تورپاقلاریندا تک سوچسوزون بورنونون قاناماسینا راضی اولمادیغیمیزی هر زامان سؤیله‌دیک، سؤیله‌ییریک. بو گون ده عینی یئرده‌ییک" دئیه دانیشدی.
طرفلره "ساواش آداب و اخلاقی" اولدوغو خاطیرلاتماسی دا ائد‌ن جمهورباشقانی، 
"غزه‌نین هاوا و قورو سالدیریلارییلا یئرله بیر ائدیلمه‌سی، مسجیدلرین بومبالانماسی، سوچسوز اوشاق، قادین، یاشلی و وطنداش اؤلوملری اصلا قبول ائدیله‌بیلمز.  عدالتلی بیر باریشین اودوزانی اولماز. تورکیه اولاراق، طرفلرین طلب ائتمه‌سی حالیندا اسیر دییشیمی داخیل هر جور آراچیلیغا حاضر اولدوغوموزو ایفاده ائتمک ایسته‌یره‌م. اسرائیل‌دن فیلیسطین تورپاقلارینا قارشی بومباردمانلارینی، فیلیسطین‌لیلردن ده اسرائیل‌ده‌کی سیویل یئرله‌شیملره قارشی ساتاشمالارینی دوردورمالارینی ایسته‌ییریک. غزه خالقینین احتیاج دویاجاغی اینسانی کؤمک لوازیمینین تداروکو قونوسوندا دا لازیم اولان حاضرلیقلاریمیزی ائدیریک" ایفاده‌لرینی ایشلتدی.
حماسین عسگری قانادی قسام توغایلاری، جمعه‌ائرته‌سی گونو اسرائیله "الاقصی توفانی" آدلی احاطه‌لی بیر سالدیری باشلاتدیغینی بیلدیرمیشدی. غزه‌دن اسرائیله مینلرجه راکت آتیلارکه‌ن سلاحلی قروپلار دا بؤلگه‌ده‌کی یئرله‌شیم یئرلرینه گیرمیشدی.
اسرائیل اوردوسو دا ساواش اوچاقلاری ایله غزه‌یه دمیر قیلینجلار عملیاتی باشلاتدیغینی آچیقلامیشدی. 
آرتان گرگینلیکده هر ایکی طرفدن یوزلرجه جان ایتکیسی وار.