فینلاندیانین ناتو-یا عضو‌لوگو تورکیه بویوک میللت مجلیسینده قبول ائدیلیب

فینلاندیانین ناتو-یا عضولوک پروتوکولونون تصدیقی ایله باغلی قانون لاییحه‌سی تورکیه بؤیوک میللت مجلیسی‌نین ایجلاسیندا قبول ائدیلدی.

بونونلا دا بو اؤلکه‌نین ناتو-یا عضو اولماسی اوچون مجلیسده آتیلان آددیم تاماملاندی. فینلاندیانین عضولوک مراجعتی بوندان اول ناتو-یا عضو اولان 29 اؤلکه طرفیندن قبول ائدیلیب.

تورکیه-نین ده راضی‌لیغی ایله فینلاندیانین ناتو-یا عضو‌لوگو مومکون اولا‌جاق. تورکیه بویوک میللت مجلیسینده قبول ائدیلن متن تصدیق اوچون پرزیدنت اردوغانا گؤندریله‌جک.

قئید ائدک کی، سوئد و فینلاندیا بیر نئچه آی اول ناتو-یا عضو اولماق اوچون عریضه ایله مراجعت ائدیب. تورکیه اونلارین قوروما عضو‌لوگو اوچون ترورچولاری دستکلمه‌مه‌لری ایله باغلی شرط ایره‌لی سوروب.

دؤولت باشچی‌سی اردوغان داها اول بیلدیریب کی، سوئد رسمی آنکارانین طلب‌لرینی یئرینه یئتیرمه‌سه، ناتو-یا عضو‌لوگو تائید ائدیلمه‌یه‌جک. او، دئییب کی، تورکیه-نین هله ده سوئد-دن بعضی گؤزلنتی‌لری وار و اونلار یئرینه یئتیریلمه‌ییب.