حولوصی آکار و اولکسی رزنیکوو آراسیندا تلفون دانیشیغی اولوب

تورکیه-نین میللی ساوونما ناظیری حولوصی آکار اوکراینانین ساوونما ناظیری اولکسی رزنیکوولا تلفون علاقه‌سی ساخلاییب.

ناظیرلیک‌دن وئریلن آچیقلامایا گؤره، حولوصی آکار گؤروش زامانی داها چوخ اینسان ایتکی‌سی‌نین قارشی‌سینی آلماق، بؤلگه‌ده باریش و ثابیتلیگین برپاسی اوچون درحال آتشکسین اعلان ائدیلمه‌سی‌نین واجیب‌لیگینی وورغولاییب.

ناظیر حولوصی آکار همچنین پرزیدنت رجب طیب اردوغان باشدا اولماقلا تورکیه-نین بؤلگه‌ده باریشین تامین اولونماسیندا و اینسانی یاردیم‌لارین چاتدیریلماسی مسئله‌سینده اوزرینه دوشنی ائتمه‌یه داوام ائدجگینی بیلدیریب.

تاخیل سازیشی چرچیوه‌سینده یارادیلمیش بیرگه کووردیناسیون مرکزی‌نین فعالیت‌لری سایه‌سینده بو گونه‌ده‌ک اوکراینا لیمانلاریندان‌ تخمینن 17 میلیون تون تاخیلین احتیاجی اولان اؤلکه‌لره تهلوکه‌سیز شکیلده داشیندیغینی قئید ائدن حولوصی آکار بو تشببوسون فاصیله‌سیز داوام ائتدیریلمه‌سی‌نین بؤیوک اهمیت کسب ائتدیگینی بیلدیریب.