اردوغان: قراری قبول ائدیلمز اولاراق دگرلندیریریک
جمهورباشقانی، تورکیهنین روسیا-اوکراینا بحرانیندا باشدان بری گرگینلیگین آزالدیلماسی اوچون صمیمی چابا گؤستردیگینی خاطیرلاتدی
جمهورباشقانی رجب طیب اردوغان،
"(روسیانین دونتسک و لوهانسکین سؤزده تانینماسی) طرفلری ساغدویویا و اولوسلارآراسی حقوقا رعایت ائتمهیه چاغیریریق" دئدی.
آفریقا سفرینی داوام ائتدیرهن اردوغان، کونگو دموکراتیک جمهوریتیندن سنگالا گئدرکهن اوچاقدا ژورنالیستلرله صحبت ائتدی.
تورکیهنین روسیا-اوکراینا بحرانیندا باشدان بری گرگینلیگین آزالدیلماسی اوچون صمیمی چابا گؤستردیگینی ایفاده ائدن جمهورباشقانی:
"بحرانین حلی ایله باغلی مئساژلاریمیزی آچیق شکیلده اورتایا قویدوق. خاریجی ایشلر باخانلیغیمیزین سون حادثهلرله باغلی وئردیگی آچیقلامادا دا روسیانین سؤزده دونتسک و لوهانسک جمهوریتلرینی تانیماسی قرارینین مینسک آنلاشمالارینا ضد اولدوغو بیلدیریلدی. بو قرارین اوکراینانین سیاسی بیرلیگینین، اگمنلیگینین و تورپاق بوتؤولوگونون آچیق شکیلده پوزونتوسو آنلامینا گلدیگی وورغولاندی" دئدی.
جمهورباشقانی اردوغان،
"قراری قبول ائدیلمز اولاراق دگرلندیریریک. طرفلری ساغدویویا و اولوسلارآراسی حقوقا رعایت ائتمهیه چاغیریریق. قارا دنیز اؤلکهسی اولدوغوموز اوچون بیر چوخ تدبیر پاکتینین اولوشدورولماسی شرطدیر. بیز ده بو تدبیرلریمیزی آلیریق، آلدیق" دئدی.
اردوغان، اوکراینا جمهورباشقانی ولادیمیر زلنسکینین بیرلشمیش میللتلر تشکیلاتی امنیت شوراسی-تورکیه-آلمانیا اورتاق ذیروه تکلیفینه باغلی،
"هم بیرلشمیش میللتلر امنیت شوراسینین عضولری هم ده دیگر اؤلکهلر قبول ائدرسه بو توپلانتیدا یئریمیزی آلاریق" ایفادهسینی ایشلتدی.