اردوغان سئل بؤلگهسینه گئتدی
"ییخیلانین یئرینه داها یاخشیسینی تیکهرک، یانانین یئرینه داها چوخونو اکهرک، آزالانین یئرینه داها چوخونو قویاراق یولوموزا داوام ائدیریک"
جمهورباشقانی رجب طیب اردوغان، کاستامونو، بارتین و سینوپدا سئلدن تأثیرلنهن یئرلرین "فاجعه بؤلگهسی" اعلان ائدیلدیگینی آچیقلادی.
جمهورباشقانی اردوغان، ۱۱ آگوستدا باتی قارادنیز بؤلگهسینده تأثیرلی اولان آشیری یاغیشلار نتیجهسینده سئل و سو باسقینلارینین میدانا گلدیگی کاستامونونون بوزقورد ائلچهسینه گئتدی.
اردوغان، بؤلگهده سئلدن تأثیرلنهنلره خطابیندا، ضررلرینین ان قیسا مدتده آرادان قالدیریلاجاغینی ایفاده ائتدی.
جمهورباشقانی،
"اللهین اذنی ایله بو فاجعهلری ده آشاجاغیق. نه لازیمدیرسا دؤولت اولاراق الیمیزدن گلهنی سرعتله ائدیب، کوللریمیزدن انشاالله یئنیدن آیاغا قالخاجاغیق.
بو دؤولت هئچ بیر زامان چؤکمهدی، ییخیلمادی یئنه ییخیلمایاجاغیق و سرعتله، ان قیسا زاماندا بوتون ضررلری آرادان قالدیرمانین چاباسی ایچریسینده اولاجاغیق" دئیه دانیشدی.
جمهورباشقانی اردوغان، جمعه نامازینین آردیندان دانیشماسیندا دا، بؤلگهده ۴ مین ۷۶۰ پرسنل، ۱۹ هلیکوپتر، ۱ ایها، ۶۶ آمبولانس، ۴۱ اومکه (اولوسال مئدیکال قورتارما قروپو)، ۶۳۰ سرویس آراجی، ۴۳۷ ایش ماشینی و بیر چوخ آراج -گرهجین فعالیت گؤستردیگینی سؤیلهدی.
یوللارین و کؤرپولرین زیان گؤرمهسی سببیله نقلیاتی آخسایان یئرلر اوچون آلتئرناتیو یوللار اوزرینده قورویوللاری اکیبلرینین چالیشدیغینی ایضاح ائدن اردوغان،
"کرئدی دستگیندن وئرگی ارتهلمهلرینه قدر بوتون عاجل تدبیرلری دؤورهیه آلمیش دورومداییق" دئدی.
اردوغان، کاستامونو، بارتین و سینوپدا سئلدن تأثیرلنهن یئرلرین "فاجعه بؤلگهسی" اعلان ائدیلدیگینی آچیقلادی.
جمهورباشقانی اردوغان،
"حیاتینی ایتیرهن اینسانلاریمیزی گئری گتیرهبیلمریک اما دؤولتیمیز اونون دیشینداکی هر جور ضرری تلافی ائدجک گوجه، ایمکانا، قرارلیلیغا صاحبدیر. ییخیلانین یئرینه داها یاخشیسینی تیکهرک، یانانین یئرینه داها چوخونو اکهرک، آزالانین یئرینه داها چوخونو قویاراق یولوموزا داوام ائدیریک" ایفادهلرینی ایشلتدی.