دونیادان تورکیهیه دستک و دایانیشما مئسازلاری گلیر
یانغینا قارشی مبارزهنی دستکلهمک اوچون آذربایجاندان ۲۲۰ پرسنل، ۴۱ی یانغینسؤندورهن ماشین اولماقلا توپلامدا ۵۳ آراج گلدی
تورکیهنین آیری آیری بؤلگهلرینده باش وئرهن اورمان یانغینلاری اوچون یورددیشیندان باشساغلیغی و دایانیشما مئساژلاری گلمهیه داوام ائدیر.
قیرقیزیستان پرزیدنتی سادیر جاپاروو مئشه یانغینلاریندا حیاتینی ایتیرهنلر اوچون پرزیدنت رجب طیب اردوغانا باشساغلیغی وئردی.
جاپاروو مئساژیندا، "تورکیهنین بیر چوخ بؤلگهسینده باش وئرهن یانغینلار نتیجهسینده حیاتینی ایتیرهنلرین خبری منی چوخ کدرلندیردی. بو چتین گونلرده تورکیه خالقینا دوغال اولایارین عهدهسیندن گلمک اوچون جسارت و عزم آرزولاییرام" ایفادهسینی ایشلتدی.
جاپاروو، اؤزو و قیرغیزیستان خالقی آدیندان یانغینلار نتیجهسینده حیاتینی ایتیرهنلرین عائلهلرینه باشساغلیغی وئردی و یارالیلارین تئزلیکله ساغالماسینی آرزولادی.
سوئد خاریجی ایشلر باخانی آن لینده، توئیتر حسابیندا خاریجی ایشلر باخانی مؤولود چاووشاوغلونا دایانیشما و باشساغیغی مئساژی وئرهرک، "تورکیهده اؤلومجول مئشه یانغینلاریندا حیاتینی ایتیرهنلره باشساغلیغی وئریرم. دایانیشمامیز و دوشونجهلریمیز تورکیه خالقی و آلوولارلا مبارزه ائدنلرله بیرلیکده" دئیه یازدی.
آوروپا بیرلیگی کمیسیونو، تورکیهدهکی یانغینلارلا مبارزهنی دستکلهمک اوچون ۳ یانغینسؤندورمه اوچاغینین گؤندریلهجگینی بیلدیردی.
بحران یؤنتیمیندن مسئول آوروپا بیرلیگی کمیسری یانتس لنارچیچ، آوروپا بیرلیگینین بو چتین گونلرده تورکیه ایله تام دایانیشمادا اولدوغونو ایفاده ائدرک، "داها چوخ یاردیم گؤسترمهیه حاضیریق" دئدی.
قطر ایچ گوونلیک گوجلرینین اولوسلارآراسی آختارما و قورتارما قروپوندان بیر اکیپ، قطر امیری شیخ تمیم بن حمد آلثانینین گؤستریشی ایله تورکیهیه یولا دوشدو. اکیپ، مئشه یانغینلاریندا ایتکین دوشهنلرین آختارما و قورتارما ایشلرینه قاتیلاجاق.
یانغینا قارشی مبارزهنی دستکلهمک اوچون آذربایجاندان ۲۲۰ پرسنل، ۴۱ی یانغینسؤندورهن ماشین اولماقلا توپلامدا ۵۳ آراج گلدی.